စစ်ကိုင်းတိုင်း၊ ရွှေဘိုမြို့နယ်၊ မြင်းစီးပျူစောထီးကျေးရွာမှလာသော စစ်ကောင်စီတပ်သားများနှင့်ပျူစောထီးများအား တိုက်ခိုက်ရာ ထိခိုက်သေဆုံးမှုရှိကြောင်း FIRE Dragon (KU)အဖွဲ့၏ ပြန်ကြားရေးတာဝန်ခံက ပြောသည်။
ဒီဇင်ဘာ ၅ ရက် နေ့လယ် ၂ နာရီခွဲခန့်ကမြင်းစီးပျူစောထီးရွာမှ ထွတ်လာသော အင်အား ၃၀ ဝန်းကျင်ပါသည့် စစ်ကောင်စီတပ်သား၊ ရဲနှင့်ပျူစောထီးများအား ကန်သာကုန်းရွာ အရှေ့ကန်သို့ အရောက်တွင် စတင်မိုင်းဆွဲတိုက်ခိုက်ခဲ့ကြောင်း FIRE Dragon (KU)အဖွဲ့၏ ပြန်ကြားရေးတာဝန်ခံက ပြောသည်။
တိုက်ခိုက်မှုကြောင့် ရဲသုံးဦးနှင့် ပျူစာထီး နှစ်ဦးသေဆုံးကြောင်း ၎င်းက ဆိုသည်။
“သူတို့က ခြေလျင်ထွက်လာတာ။ စစ်သားကနည်းနည်း။ ရဲနဲ့ပျူများတာ။ မြင်းစီးပျူခြံမှာနေတာပါ။ ရွှေဘိုမြို့ပေါ်ကိုပြန်ဖို့ထွက်လာကြတာပါ။”ဟု FIRE Dragon (KU)အဖွဲ့၏ ပြန်ကြားရေးတာဝန်ခံက ပြောသည်။
Public Service Announcement
စစ်အုပ်စုဘက်ကလည်း လက်နက်ကြီး၊ ငယ်များဖြင့် ပြန်လည်ပစ်ခတ်သော်လည်း ပြည်သူ့ရဲဘော်များ ထိခိုက်မှုမရှိကြောင်း ဒေသတွင်းတော်လှန်ရေးအင်အားစုများက ပြောသည်။
အဆိုပါ တိုက်ခိုက်မှုကို FIRE Dragon (KU)အဖွဲ့နှင့် ONEDAY REVOLUTION FORCE (Shawe Bo)၊ ရွှေဘိုခရိုင် တပ်ရင်း(၄)နှင့် ရွှေဘိုမြို့ နယ်မြေခံပကဖများ ပူးပေါင်းတိုက်ခိုက်ခဲ့ခြင်းဖြစ်သည်။
ပြီးခဲ့သည့်ရက်ပိုင်းအတွင်းကလည်း ရွှေဘိုမြို့နယ်၊ သီးလုံးပျူရွာနှင့် ပန်းရံပျူစောထီးရွာရှိ စစ်ကောင်စီတပ်သားများနှင့်ပျူစောထီးများအား ဒေသတွင်းအခြားအဖွဲ့များက ဒရုန်းများ၊ လက်နက်ကြီး၊ လက်နက်ငယ်များဖြင့် တိုက်ခိုက် ခဲ့သေးသည်။
