မိထက်/People’s Spring
ရှမ်းပြည်နယ်မြောက်ပိုင်း သိန္နီမြို့မဈေးအတွင်း လူစည်ကားနေချိန် ယနေ့(ဇူလိုင် ၁၈) ညနေ ၅နာရီခန့်တွင် စစ်ကောင်စီက လေကြောင်းမှ ဗုံးကြဲတိုက်ခိုက်ရာ အရပ်သားထိခိုက်သေဆုံးမှုများပြားကြောင်း သတင်းရရှိသည်။
” မြို့မစျေးကို Y12 လေယာဉ်နဲ့ ကြဲသွားတာ။အရေးပေါ်ကာလမို့လို့ ဒေသခံတွေက ဈေးဝယ်ထွက်နေတဲ့အချိန် ပစ်ချသွားတာ။ ၂၀ ဦးလောက် သေတယ်လို့ သိရပါတယ်။ သေဆုံးသူတွေကောဒဏ်ရာသူတွေကိုပါ ဆေးရုံကိုခေါ်သွားကြတယ်” ဟု ဒေသခံတစ်ဦးက ပြောသည်။
Public Service Announcement
စစ်ကောင်စီလေကြောင်းတိုက်ခိုက်မှုအတွင်း သေဆုံးသူအရေအတွက်နှင့် အသေးစိတ် အခြေအနေကိုမူ မသိရှိရသေးပေ။
လေကြောင်းမှ တိုက်ခိုက်ခံရသည့် မြို့မစျေးမှာ အပျက်အစီးအလွန်များသည်ကို ထွက်ပေါ်လာသည့် ဓာတ်ပုံမှတ်တမ်းများတွင် တွေ့ရသည်။
” သေဆုံးသူတွေထဲမှာ လူငယ်တွေ၊ မိသားစုကို ရှာဖွေအလုပ်အကျွေးပြုနေတဲ့ မိခင်၊ ဖခင်၊ သားသမီးကောင်းရတနာတွေ ပါဝင်ပါတယ်။ အင်မတန်မှ ဝမ်းနည်းထိခိုက်နာကျည်းရပါတယ်ဗျာ”ဟု ဒေသခံတစ်ဦးက လူမှုကွန်ရက်တွင် ရေးသားထားသည်။
စစ်ကောင်စီသည် ဇူလိုင် ၁၁ရက် ညပိုင်းကလည်း သိန္နီမြို့အထက်တန်းကျောင်းကို လေကြောင်းတိုက်ခိုက်ရာ ကျောင်းဆောင်ပြိုကျပျက်စီးသွားခဲ့သည်။
သိန္နီမြို့သည် ပြည်ထောင်စုလမ်းမအတိုင်း လားရှိုးမြို့နှင့် တဆက်တည်းရှိပြီး ၁၀၂၇ စစ်ဆင်ရေးပထမပိုင်းတွင် စစ်ကောင်စီစခန်းများကို ကိုးကန့်တပ်မတော်(MNDAA)က တိုက်ခိုက် သိမ်းပိုက်ပြီး ထိန်းချုပ်ထားသည့်မြို့ဖြစ်သည်။
