ဇော်ရမ်း/People’s Spring
ရှမ်းပြည်နယ်တောင်ပိုင်း၊ ရပ်စောက်မြို့နယ်တွင် ဩဂုတ် ၈ရက်က ဖြစ်ပွားသော တိုက်ပွဲအတွင်း သေဆုံးသွားသူ ကိုးဦးတွင် စစ်ကောင်စီ၏ ခလရ(၂၉၂)တပ်ရင်းမှူးပါဝင်ကြောင်း ဓနုပြည်သူ့လွတ်မြောက်ရေးတပ်တော်(DPLF/DPLA)က ပြောသည်။
ရပ်စောက်မြို့နယ် ကျောက်ဂူဒေသတွင် ဩဂုတ် ၈ရက်က တိုက်ပွဲဖြစ်ခဲ့ပြီး နောက်ဆက်တွဲစစ်ဆေးမှုများအရ ခလရ(၂၉၂)တပ်ရင်းမှူးဗိုလ်မှူးမျိုးမျိုးသူ သေဆုံးသွားခြင်းဟု DPLF/DPLA တာဝန်ရှိသူတစ်ဦးက ပြောသည်။
Public Service Announcement
ဗိုလ်မှူးမျိုးမျိုးသူ၏ ရုပ်အလောင်းကို DPLF/DPLA က ရရှိထားသည်။
ယင်းနေ့က တိုက်ပွဲအတွင်း စစ်ကောင်စီဘက်မှ ကိုးဦးသေဆုံးကာ ရှစ်ဦး အရှင်ဖမ်းမိပြီး သေနတ် ၁၉လက် သိမ်းဆည်းနိုင်ခဲ့ကြောင်း ဓနုပြည်သူ့လွတ်မြောက်ရေးတပ်တော်(DPLF/DPLA) က သတင်းထုတ်ပြန်ထားသည်။
အဆိုပါ စစ်ကြောင်းတွင် စစ်ကောင်စီတပ်သား ၉၀ဦးထက်မနည်းပါဝင်ခဲ့သည်။ကျန်သူများသည် စစ်ကောင်စီ၏လေကြောင်းပစ်ကူယူ၍ ထွက်ပြေးသွားခဲ့ကြောင်း သိရသည်။
ဖမ်းမိထားသည့် စစ်သုံ့ပန်းများက ၎င်းတို့သည် စစ်မတိုက်ချင်ကြောင်းနှင့် မိသားစုဝင် များ၏ လုံခြုံရေးကိုစိတ်ပူ၍ စစ်တပ်မှ ထွက်မပြေးနိုင်ခဲ့ခြင်းဟု DPLF/DPLAထံ ပြောကြားထားသည်။
“ရှစ်ယောက်ထဲက သုံးယောက်က သေနတ်ချပီး သူဘာသူ လက်မြောက်အညံ့ခံတာ။တိုက်ပွဲဖြစ် ပြီးနောက်ရက် ရှေ့တန်းလိုက်ရတဲ့ အရာရှိ ရဲဘော်တွေလည်း ပြေးကြသူတွေရှိတယ်” ဟု DPLF/DPLA တာဝန်ရှိသူတစ်ဦးက ပြောသည်။
ယခုအခါ စစ်ကောင်စီသည် ကျောက်ဂူအမြောက်တပ်မှနေ၍ အနောက်ဘက်တောင် ကြောတလျှောက် လက်နက်ကြီးများရမ်းသမ်းပစ်ခတ်နေရာ ဖက်ရင်းကုန်း၊ လွယ်ဟောင်၊ ပုန်းအင်း၊အုန်းကြော၊လွယ်ကန် ၊တောင်သူကုန်းနှင့် စပယ်ကုန်းရွာတို့မှ ဒေသခံများသည် လက်နက်ကြီးအန္တရာယ်စိုးရိမ်နေရသည်ဟု ဒေသခံများကပြောသည်။
လက်ရှိတွင် စစ်ကောင်စီက ဒေသတွင်း အင်အားတိုးထား၍ ဒေသခံများ စစ်ရေးသတိပြုနေထိုင်ကြရန် DPLF/DPLAက သတိပေးထားသည်။
ရပ်စောက်မြို့သည် ရှမ်းပြည်နယ်မြောက်ပိုင်းနှင့် ထိစပ်နေသည်။ စစ်ကောင်စီက ရပ်စောက်မြို့မှတစ်ဆင့် ရှမ်းပြည်နယ်မြောက်ပိုင်းသို့ အင်အားဖြည့်တင်းမှုများပြုလုပ်နေသည်။
DPLF/DPLAသည် ရှမ်းပြည်နယ်တောင်ပိုင်း ဓနုကိုယ်ပိုင်အုပ်ချုပ်ခွင့်ရဒေသမှ ပြည်သူ့ကာကွယ်ရေးတပ်ဖွဲ့ဖြစ်ပြီး ၁၀၂၇ စစ်ဆင်ရေး ပထမပိုင်းရော ဒုတိယပိုင်းတွင်ပါ တအာင်းတပ်မတော်(TNLA)နှင့် ပူးတွဲပါဝင်တိုက်ခိုက်နေသည်။
ပြီးခဲ့သည့် ဩဂုတ် ၂ရက်က မြစ်ကြီးနားမြို့၊ တီယန်ဇွပ်ကျေးရွာ စစ်ကောင်စီစခန်းသိမ်းတိုက်ပွဲတွင်လည်း ဝိုင်းမော်မြို့ခလရ(၅၈)တပ်ရင်းမှူးသေဆုံးခဲ့သည်။
ရပ်စောက်တိုက်ပွဲအတွင်း စစ်ကောင်စီ၏ တပ်ရင်းမှူးနှင့် တပ်သားများ၏ သေဆုံးရုပ်အလောင်းပုံများအား လူထုနွေဦး၏ https://t.me/PeopleSpring တွင် သွားရောက်ကြည့်ရှု့နိုင်ပါသည်။
