စစ်ရိပ်စစ်ငွေ့ကြောင့် ပြင်ဦးလွင်မြို့ ခြောက်သွေ့နေ

ဆိုင်းမင်း/People’s Spring

စစ်တက္ကသိုလ်တွေတည်ရှိရာပြင်ဦးလွင်မြို့မှာ စစ်ရိပ်စစ်ငွေ့ သန်းလာပြီးနောက် တချိန်က အပန်းဖြေ မြို့ ဖြစ်ခဲ့တဲ့ပေမယ့် လက်ရှိမှာတော့ တိတ်ဆိတ်ခြောက်ကပ်နေပါပြီ။

မြို့ပေါ် အပါအဝင် ရပ်ကွက်အချို့မှာ နေအိမ်တွေ နဲ့ ဆိုင်ခန်းတွေ သော့ခတ်ပြီး ပိတ်ထားကြတယ်လို့ အခုရက်ပိုင်း ပြင်ဦးလွင်ဆီ ရောက်ရှိခဲ့သူ အချို့ထံကသိရပါတယ်။

Public Service Announcement

တိုက်ပွဲတွေ မြို့နား ကပ်လာချိန်မှာ ပြင်ဦးလွင်ဆီ လာရောက်လည်ပတ်တဲ့ ခရီးသွားဧည့်သည် မရှိသလောက်နည်းပါးသွားသလို ဟိုတယ်တွေလည်း ပိတ်ထားကြပါတယ်။

ပြင်ဦီးလွင်က နာမည်ကြီး အမျိုးသားကန်တော်ကြီး ဥယာဉ် အပါအဝင် အပန်းဖြေ နေရာတွေ မှာလည်း လူအဝင်အထွက် ပါးသွားတယ်လို့သိရပါတယ်။

စစ်တပ်နဲ့ ထိစပ်နေတဲ့ နေရာတွေမှာနေထိုင်ကြတဲ့ဒေသခံတွေ လည်း နေရာရွှေ့ပြောင်းတာရှိနေပါတယ်။

” သာမာန်ပြည်သူကတော့ ရပ်ကွက်တွေထဲမှာဆက်ရှိနေပါတယ်”လို့ ပြင်ဦးလွင်မြို့ခံတစ်ဦးကပြောပါတယ်။

ပြင်ဦးလွင်မှာ စားသောက်ဆိုင်တွေကို ည ၈ နာရီ နောက်ဆုံးထား ပိတ်ခိုင်းထားပြီး ညပိုင်းမှာ မြို့တွင်း ၊မြို့ပြင် လူအသွားအလာ ရှင်းလင်းသွားတယ်လို့သိရပါတယ်။

လက်ရှိမှာ ပြင်ဦးလွင်မြို့ အရှေ့ဘက် မိုင် ၅၀ ကျော်အကွာ တောင်ခမ်းရွာတဝိုက်က စစ်ကောင်စီရဲ့ အမြှာက်တပ်ရင်းတွေ ကို တအာင်းတပ်(TNLA) နဲ့ PDF ပူးပေါင်းတပ်က ထိုးစစ်ဆင်တိုက်ခိုက်နေချိန်လည်း ဖြစ်ပါတယ်။

အဲဒီတိုက်ပွဲတွေမှာပြင်ဦးလွင်မြို့ပြင်မှာရှိတဲ့ စစ်ကောင်စီတပ်က လက်နက်ကြီးပစ်ကူပေးတဲ့ ပစ်ခတ်သံတွေကို မြို့ပေါ်က ပါ အတိုင်းသားကြားနေရတယ်လို့ သိရပါတယ်။

ဒါအပြင် ပြင်ဦးလွင်မြို့ဆီ ဝင်ထွက်ရာ မြို့ပြင်ရှိ ကုန်းမြင့်တွေမှာ စစ်ကောင်စီတပ်က နေရာယူတပ်စွဲထားတယ်လို့လည်းသိရပါတယ်။

ပြီးခဲ့တဲ့ သြဂုတ်လဆန်းပိုင်းအတွင်း နောင်ချိုမြို့အထိ TNLA က သိမ်းယူပြီးနောက် ပြင်ဦီးလွင်ဆီ ဆက်တက်တိုက်ခိုက်မယ်ဆိုတဲ့သတင်းတွေကြောင့် ပြင်ဦးလွင်ကပြည်သူတွေ အလုံးအရင်းနဲ့ မန္တလေးဘက်ဆီ ထွက်ခွာခဲ့ကြတာရှိပါတယ်။