တိုက်ပွဲတွေကြောင့် ပျက်စီးခဲ့တဲ့ အာရှလမ်းပိုင်း ပြင်ဆင်ရေး ညှိနှိုင်းလုပ်ဆောင်လိုကြောင်း ထိုင်းပြောကြား

မြန်မာနိုင်ငံရဲ့ ပြည်တွင်း ပဋိပက္ခတွေကြောင့် ပျက်စီးခဲ့တဲ့ အမှတ် ၁ အာရှ လမ်းမကြီးရဲ့ လမ်းပိုင်းနေရာတွေကို မြန်မာဖက်မှာ တိုက်ပွဲဖြစ်နေတဲ့ အစုအဖွဲ့ အသီးသီးနဲ့ ညှိနှိုင်းပြီး ပြုပြင်သွားလိုကြောင်း ထိုင်းအစိုးရက ပြောပါတယ်။

အဲဒီလမ်းပိုင်းကို ပြန်လည် မွမ်းမံ ပြင်ဆင်ပြီးရင် နယ်စပ် ကုန်သွယ်ရေး ချောမွေ့စေဖို့၊ ထိုင်း-မြန်မာနယ်စပ် တည်ငြိမ်အေးချမ်းရေးကို သေချာခိုင်မာစေဖို့လည်း အားထည့် လုပ်ဆောင်လိုတယ်လို့ ထိုင်းနိုင်ငံခြားရေး ဝန်ကြီး မာရစ် ဆမ်ဂီယန်ပွန်ဆာက စက်တင်ဘာ ၁၉ ရက်နေ့မှာ ပြောကြားခဲ့ပါတယ်။

ပျက်စီးနေတဲ့ အမှတ် ၁ အာရှလမ်းပိုင်း ပြင်ဆင်ရေးကို အကောင်အထည် ဖော်ရာမှာ အာဏာသိမ်း စစ်ကောင်စီနဲ့ရော တော်လှန်ရေး အင်အားစုတွေနဲ့ပါ ညှိနှိုင်းဖို့ လိုအပ်မယ်လို့ သူက မှတ်ချက် ပေးခဲ့ပါတယ်။

Public Service Announcement

ထိုင်းဟာ တိုက်ပွဲတွေကြောင့် ပျက်စီးမှုတွေ ဖြစ်ပေါ်ခဲ့တဲ့ အမှတ် ၁ အာရှအဝေးပြေးလမ်းမကြီး ပြန်လည် ပြုပြင်ရေး အစီအမံတွေကို ဦးဆောင်ဖို့အတွက် အာဆီယံ အဖွဲ့ရော၊ မြန်မာ့ အိမ်နီးချင်း အိန္ဒိယ နိုင်ငံဆီကပါ ထောက်ခံမှုကို ရရှိထားပါတယ်။

သတင်းထောက်တွေနဲ့ တွေ့ဆုံချိန်မှာ မာရစ်က သူ့အမြင်အရ မြန်မာနိုင်ငံ ပဋိပက္ခကို စစ်မက်ရေးရာတွေနဲ့ ဖြေရှင်းလို့ မရနိုင်ဘဲ အပြုသဘောဆန်တဲ့ ဆွေးနွေးညှိနှိုင်းမှုတွေနဲ့သာ အဖြေရှာနိုင်မယ်လို့ ယုံကြည်ထားကြောင်းလည်း ဆိုပါတယ်။

မြန်မာနိုင်ငံဟာ စစ်တပ် အာဏာသိမ်းပြီး နောက်ပိုင်း အရှိန်အဟုန် မြင့်လာတဲ့ ပြည်တွင်း ပဋိပက္ခတွေနဲ့ ရုန်းကန်နေရပြီး အာဏာသိမ်းမှုကို ဆန့်ကျင်တဲ့ လက်နက်ကိုင် တော်လှန်ရေး လှုပ်ရှားမှုတွေဟာ နိုင်ငံအနှံ့မှာ ပျံ့နှံ့ ဖြစ်ပေါ်နေပါတယ်။

ကိုးကား: Bangkok Post⁩