ရန်ကုန်မြို့ မရမ်းကုန်းမြို့နယ် သမိုင်းလမ်းဆုံတွင် ယနေ့ (ဇွန်လ ၁၉ ရက်) နံနက်ပိုင်းက လူငယ်များစုပေါင်း၍ စစ်အာဏာရှင်ဖြုတ်ချရေးနှင့် ဒေါ်အောင်ဆန်းစုကြည်၏ (၇၆)နှစ်ပြည့် မွေးနေ့အထိမ်းအမှတ်အဖြစ်ပျောက်ကြားသပိတ် ချီတက်ဆန္ဒပြကြခဲ့သည်။
ယင်းသပိတ်စစ်ကြောင်းတွင် ကြည့်မြင်တိုင်၊စမ်းချောင်း၊ ကမာရွတ်စသည့်မြို့နယ်များမှ လူငယ်များနှင့် ပြည်သူ ၁၀၀ ကျော်တို့ ပူးပေါင်းပါဝင်ခဲ့သည်။
လူငယ်များသည် မွေးနေ့ရှင်ဒေါ်အောင်ဆန်းစုကြည်အပါအဝင် ဖမ်းဆီးခံခေါင်းဆောင်များ လွှတ်ပေးရေးနှင့် ဒီမိုကရေစီရရှိစေရေး ကြွေးကြော်ဆန္ဒပြခဲ့ကြသည်။
မြန်မာနိုင်ငံတွင် အကြမ်းဖက်စစ်ကောင်စီက မတရားသဖြင့် အာဏာသိမ်းပိုက်ထားသည်မှာ ယနေ့ ၁၃၉ ရက် ပြည့်မြောက်ခဲ့ပြီ ဖြစ်သည်။
Public Service Announcement
ရန်ကုန်မြို့တွင် ငြိမ်းချမ်းစွာ ဆန္ဒထုတ်ဖော်မှုများကို အကြမ်းဖက်နှိမ်နင်းမှုများ ရှိနေသော်လည်း လူငယ်များက နေ့စဉ်ရက်ဆက် ပုံစံမျိုးစုံဖြင့် ဆန္ဒပြမှုများ ပြုလုပ်လျက်ရှိသည်။
