ယနေ့နံနက် ၈နာရီခွဲမှစ၍ စစ်ကောင်စီတပ်များက မန္တလေး ပြည်သူ့ကာကွယ်ရေးတပ်(PDF) တပ်ခွဲတစ်ခုကို ဝင်ရောက်စီးနင်းရာမှ အပြန်အလှန်ပစ်ခတ်မှု ပြုလုပ်နေခြင်းဖြစ်ကြောင်း PDFက သတင်းထုတ်ပြန်ထားသည်။
“အိမ်ရှေ့က စစ်ကား လေးငါးစီး ဖြတ်သွားပြီး မနော်ဟယ်ရီလမ်း နားကျတော့ ပစ်ကြတာပဲ။
အခုချိန်ထိ ပစ်တုန်းပဲ။ မနော်ဟရီတစ်၀ိုက်မှာ ဖြစ်နေတာ။ ဖျောက်ဖျောက်ဖျောက်ဖျောက်ကြားလိုက် ၀ုန်းဒိုင်းနဲ့ကြားလိုက်ပဲ။ တောထဲ တောင်ထဲရောက်နေသလိုပဲ မြို့နဲ့ကိုမတူဘူး ပစ်နေတာ” ဟု ပစ်ခတ်မှု ဖြစ်ပွားရာနေရာအနီး၌ ရှိနေသူတစ်ဦးက ပြောသည်။
မန္တလေး PDFက သတင်းထုတ်ပြန်ရာတွင် ၎င်းတို့၏ ပျောက်ကျားတပ်ခွဲတစ်ခု ဝင်စီးခံရပြီး စစ်ကောင်စီနှင့် အပြန်အလှန် တိုက်ခိုက်မှုဖြစ်ပွားနေကြောင်း၊ မန္တလေးပြည်သူများ၏ အကူအညီများစွာ လိုအပ်နေကြောင်း၊ အခြား PDF တပ်ခွဲများမှ စီးနင်းခံရသော PDF နေရာသို့ ဝင်ရောက်ကူညီ ပစ်ခတ်ခြင်း တပ်ကူပေးခြင်းများနှင့်ပတ်သက်ပြီး ပြည်သူလူထုအနေဖြင့် Social Media ပေါ်တင်ခြင်း မျှဝေခြင်း မပြုလုပ်ပါရန် လေးစားစွာ မေတ္တာရပ်ခံကြောင်း ဖော်ပြခဲ့သည်။
စစ်ကောင်စီတပ်၏ စစ်ကူများ အဟန့်အတားဖြစ်စေရေး ကူညီဆောင်ရွက်ရန် PDF အဖွဲ့၏ မေတ္တာရပ်ခံချက်ကိုလည်း မြို့ခံပြည်သူအချို့က နံနက် ၁၁နာရီ နောက်ပိုင်းတွင် တာယာများ မီးရှို့ခြင်းဖြင့် ကူညီလျက်ရှိကြောင်း မန္တလေးမြို့ခံတစ်ဦးက ဆက်ပြောသည်။
“အခု ငါတို့လမ်းထိပ်မှာတောင် တာယာတွေမီးရှို့နေကြတယ်။ ဗုံးလည်း ခဏခဏကွဲတယ်။ အခုတောင် ငါတို့နားမှာ ပစ်သံကြားနေရတယ်” ဟု မန္တလေး မနော်ဟရီ ၄၉လမ်းတွင် နေထိုင်သူ တစ်ဦးက နံနက် ၁၁နာရီခွဲခန့်တွင် ပြောသည်။
Public Service Announcement
