အာဆီယံနိုင်ငံခြားရေးဝန်ကြီးတွေဟာ မြန်မာအထူးကိုယ်စားလှယ်အဖြစ် ဘရူနိုင်းနိုင်ငံခြားရေးဒုတိယဝန်ကြီးကို ခန့်အပ်လိုက်တယ်လို့ သံတမန်လေးဦးရဲ့ ပြောဆိုချက်အရ Reuters သတင်းဌာနက ဒီနေ့ဖော်ပြပါတယ်။
လွန်ခဲ့တဲ့ ခြောက်လက အရပ်သားအစိုးရကို ဖယ်ရှားခဲ့တဲ့ မြန်မာစစ်တပ်ဟာ အထူးကိုယ်စားလှယ်နေရာကို ထိုင်းနိုင်ငံခြားရေး ဒုတိယဝန်ကြီးဟောင်းကို ခန့်အပ်ဖို့လိုလားပေမယ့် ဘရူနိုင်းဒုတိယဝန်ကြီး Erywan Yusof ကို အာဆီယံက အတည်ပြုခဲ့တာဖြစ်ပါတယ်။
အထူးကိုယ်စားလှယ်ခန့်အပ်ရေးဟာ အာဆီယံနိုင်ငံတွေအကြား လအတန်ကြာ အငြင်းအခုံဖြစ်ခဲ့ပြီး အထူးကိုယ်စားလှယ်ဟာ မြန်မာနိုင်ငံမှာ အကြမ်းဖက်မှုလျော့ကျရေးနဲ့ စစ်တပ်နဲ့ သူ့ရဲ့ ဆန့်ကျင်ဘက်တွေကြား ညှိနှိုင်းဆွေးနွေးဖို့ စတင်ရေးတို့ကို လုပ်ဆောင်ရမှာဖြစ်ပါတယ်။
ကုလသမဂ္ဂနဲ့ အမေရိကန်၊ တရုတ်တို့ အပါအဝင် နိုင်ငံအများစုက မြန်မာနိုင်ငံမှာ ပြန်လည်တည်ငြိမ်ရေးအတွက် အာဆီယံက သံတမန်ရေးကြိုးပမ်းမှုတွေနဲ့ ဦးဆောင်ဖို့ တိုက်တွန်းထားပါတယ်။