စစ်ကောင်စီ မတရားဖမ်းဆီးထားတဲ့ ဒေါက်တာမောင်မောင်ငြိမ်းထွန်း ကိုဗစ်ရောဂါနဲ့ကွယ်လွန်သွားပြီလို့ မိသားစုက ဆွေမျိုးမိတ်ဆွေတွေကို အသိပေးလိုက်ပါတယ်။
“သားကြီး ကိုဗစ်ပြင်းထန်ဝေဒနာတွေက လွတ်မြောက်ပြီး ကောင်းရာဘုံဘဝတပါးကို ငြိမ်းချမ်းစွာ ကူးပြောင်းသွားပါပြီ” လို့ ဒေါက်တာရဲ့ မိခင် ဒေါက်တာဒေါ်ညွန့်မေက ဆွေမျိုးမိတ်ဆွေတွေကို မသိပေးစာ ဆိုရှယ်မီဒီယာမှာ တင်ထားပါတယ်။
ဒီကနေ့ မနက် ၆ နာရီ ၃၈ မိနစ်မှာ ကွယ်လွန်သွားတာဖြစ်ပြီး မန္တလေးပြည်သူ့ဆေးရုံကြီး ICU မှာ ဇူလိုင် ၂၇ ရက်ကတည်းက တက်ရောက်ကုသမှုခံယူခဲ့ရတာဖြစ်တယ်လို့ မိခင်ဖြစ်သူက ပြောထားပါတယ်။
အသက် ၄၅ နှစ်အရွယ် ဒေါက်တာမောင်မောင်ငြိမ်းထွန်းက မန္တလေးဆေးတက္ကသိုလ် ခွဲစိတ်ကုပညာဌာနရဲ့ ကထိက ဆရာတစ်ဦးဖြစ်ပါတယ်။ ဆရာနဲ့ ဆရာ့ ဇနီးဖြစ်သူ မန္တလေးပြည့်သူ့ဆေးရုံကြီးက အထူးကုဆရာဝန်ကြီး ဒေါက်တာဆွေဇင်ဦးတို့ကို စစ်ကောင်စီက ဖမ်းဆီးခဲ့ပြီးနောက် တရားခံပြေးတွေအဖြစ်အမည်တပ် ပြီး သူတို့ရဲ့ ဝါဒဖြန့်မီဒီယာက တဆင့် ကြေညာခဲ့တာပါ။
Public Service Announcement
ဒေါက်တာဇော်ဝေစိုး၊ ဒေါက်တာထားထားလင်းတို့နဲ့ ဆက်နွယ်တယ်ဆိုပြီး ဇနီးမောင်နှံ နှစ်ဦးစလုံး စစ်ကောင်စီက ဇွန် ၁၃ ရက်က ဖမ်းဆီးခံခဲ့ရတာဖြစ်ပါတယ်။ ဖမ်းမိပြီးနောက် မန္တလေး နန်းတွင်းစစ်ကြောရေးမှာ စစ်ဆေးခံခဲ့ရပြီးနောက် မန္တလေးအိုးဘိုထောင်ကို ပို့လိုက်တာဖြစ်ပါတယ်။
အခုလိုအကျဉ်းကျနေစဉ် ကိုဗစ်ရောဂါနဲ့ ဆုံးပါးသွားတာဖြစ်ပြီး ဇနီးဖြစ်သူကတော့ ဖမ်းဆီးခံထားရဆဲဖြစ်ပါတယ်။
“ဒီလိုစိတ်မကောင်းစရာ အဖြစ်အပျက်တွေအားလုံးရဲ့ တရားခံဟာ စစ်ကောင်စီပဲဖြစ်တယ်။ ဒေါက်တာမောင်မောင်ငြိမ်းထွန်း မိသားစုနဲ့ထပ်တူ နိုင်ငံနဲ့ထပ်တူ ဝမ်းနည်းကြေကွဲရပါတယ်။ ဥပဒေမဲ့ဖမ်းဆီးထားတဲ့ ကျန်းမာရေးဝန်ထမ်းတွေအပါအဝင် နိုင်ငံရေးအကျဥ်းသားတွေအားလုံး ချက်ချင်းလွှတ်ပေးဖို့ စစ်ကောင်စီကိုထပ်တောင်းဆိုလိုက်ပါတယ်” လို့ NGU ကျန်းမာရေးဝန်ကြီး ဒေါက်တာဇော်ဝေစိုးက ရေးသားထားပါတယ်။
အကျဉ်းထောင်တွေထဲမှာ ကိုဗစ်ကူးစက်မှုဆိုးရွားတဲ့အခြေအနေတွေကို ကြားနေရပြီးတော့ ပြီးခဲ့တဲ့ ဇူလိုင် ၂၀ ရက်ကလည်း အင်းစိန်အကျဉ်းထောင်မှာ ဖမ်းဆီးခံထားရတဲ့ အမျိုးသားဒီမိုကရေစီအဖွဲ့ချုပ်ပါတီ ထိပ်ပိုင်းခေါင်းဆောင်တစ်ဦးဖြစ်တဲ့ ဦးဉာဏ်ဝင်းဟာ ရန်ကုန်ပြည်သူ့ဆေးရုံကြီး ICU ထဲမှာ ကွယ်လွန်ခဲ့ပါတယ်။
