အာဏာသိမ်းစစ်ကောင်စီက ကိုဗစ်ကပ်ဘေးကို လက်နက်သဖွယ်သုံးနေ၍ မလိုအပ်ပဲအသက်ဆုံးရှုံးမှုများနေဟု ကရင်လူ့အခွင့်အရေးအဖွဲ့ထုတ်ပြန်

အာဏာသိမ်းစစ်ကောင်စီက ကိုဗစ်ကပ်ဘေးကို လက်နက်သဖွယ် အသုံးပြုနေသောကြောင့် မလိုအပ်ပဲ အသက်ဆုံးရှုံးမှုများစွာကို ဖြစ်ပေါ်စေကြောင်း ကရင်လူ့အခွင့်အရေးအဖွဲ့(KHRG)က ထုတ်ပြန်သည်။

ယနေ့ (ဩဂုတ် ၉ရက်)တွင် ကျရောက်သည့် အပြည်ပြည်ဆိုင်ရာ ကမ္ဘာ့ဌာနေတိုင်းရင်းသားများနေ့ နှင့်ပတ်သက်ပြီး KHRGက ထုတ်ပြန်ရာတွင် အထက်ပါအတိုင်း ဖော်ပြခဲ့ခြင်းဖြစ်သည်။

တိုင်းရင်းသားဒေသများတွင် လက်နက်ကိုင် ပဋိပက္ခ ပိုမိုပြင်းထန်လာခြင်းကြောင့် ရင်ဆိုင်ရသော အခက်အခဲများ အပြင် ကိုဗစ် ၁၉ ကပ်ဘေးသည်လည်း ထိုအခက် အခဲများကို ပိုမိုဆိုးရွားစေကြောင်း ဖော်ပြထားသည်။

မြန်မာပြည် အရှေ့တောင်ပိုင်း ရှိ ကျေးလက်ဒေသများတွင် ကျန်းမာရေးလက်လှမ်းမီနိုင်မှု အလွန်အားနည်းသောကြောင့် ဒေသခံရွာသားများ သည် ကိုဗစ် ၁၉ သံသယ လူနာများကို ၎င်းတို့၏ အိမ်တွင်းတွင်သာ ကုသမှုပေးနေရကြောင်း၊ စစ်ကောင်စီသည် ပြည် သူများကို ရရာနည်းလမ်းဖြင့် ဆေးဝါးကုသခွင့်ပေးမည့်အစား ဇူလိုင်လအစောပိုင်းမှစ၍ ပုဂ္ဂလိကဆေးရုံဆေးခန်း နှင့် လူတစ်ဦးချင်းကို အောက်ဆီဂျင်ရောင်းချခွင့်ပိတ်ပင်လိုက်ကြောင်း KHRGကဆိုသည်။

Public Service Announcement

တစ်ချိန်တည်းတွင် စစ်ကောင်စီမှ ကရင်အမျိုးသား အစည်းအရုံး (KNU)၏ ကိုဗစ်ကာကွယ်တားဆီးရေးလုပ်ဆောင်မှုများကို နှောက်ယှက်ဖျက်ဆီးမှုများ ပြုလုပ်နေပြီး မကြာသေးခင်အချိန်တွင် စစ်ကောင်စီမှ ၎င်းတို့၏စစ်ရေးလှုပ်ရှားမှုကို ပိုမိုလုပ်ဆောင်ရန် KNU ၏ကိုဗစ် စစ်ဆေးရေးဂိတ်ကို ဖျက်ဆီးကာ ဒေသတွင်းသွားလာရေးကန့်သတ်ချက်များကိုဆန့်ကျင်ခဲ့သည်ဟု ထုတ်ပြန်ခဲ့သည်။

စစ်အာဏာသိမ်းမှုနှင့် ကိုဗစ် ၁၉ ကပ်ရောဂါများကြောင့် မြန်မာပြည်အတွင်းရှိ ဌာနေတိုင်းရင်းသားများသည် အ ကြပ်အတည်းများစွာ ရင်ဆိုင်နေရ၍ နိုင်ငံတကာအသိုင်း အဝိုင်းမှ ဌာနေတိုင်းရင်းသားများ၏ အခွင့် အရေးရရှိ‌ရေးကို ကူညီထောက်ပံ့သည့်အပြင် ၎င်းတို့၏ကြံ့ကြံ့ခံနိုင်စွမ်းကိုလည်း အသိအမှတ်ပြုရန် KHRG မှ တိုက်တွန်းလိုကြောင်း ထုတ်ပြန်ခဲ့သည်။