သံအမတ်ကြီး ဦးကျော်မိုးထွန်းကိုထောက်ခံတဲ့ အွန်လိုင်းလက်မှတ်တစ်သိန်းရှစ်သောင်းကျော်ရရှိ

သံအမတ်ကြီး ဦးကျော်မိုးထွန်းကို ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်အဖြစ် ဆက်လက် ခန့်ထားပေးဖို့ အွန်လိုင်းလက်မှတ်ရေးထိုးလှုပ်ရှားမှု မှာ လက်မှတ်ပေါင်း တစ်သိန်းရှစ်သောင်းကျော် ရရှိထားပါပြီ။

အွန်လိုင်းလက်မှတ်ရေးထိုးလှုပ်ရှားမှုမှာဟာ လက်မှတ်ပေါင်း နှစ်သိန်းရရှိ ဖို့ ရည်မှန်းထားတယ်လို့ CRPH ရဲ့ နိုင်ငံတကာဆက်ဆံရေးကိုယ်စားလှယ် ဦးထင်လင်းအောင်က သူရဲ့ဖေ့ဘွတ်ခ်ကနေအသိပေးထားတာပါ။

အွန်လိုင်းကနေ လက်မှတ်ရေးထိုးတာကို သြဂုတ်လ ၂၁ ရက်နေ့နောက်ဆုံးထားပြီး ပါဝင်နိုင်မှာဖြစ်ပြီး သံအမတ်ကြီး ဦးကျော်မိုးထွန်းကိုထောက်ခံတဲ့ ဒီလက်မှတ်တွေကို ကုလသမဂ္ဂ ကိုပေးပို့သွားမယ်လို့သိရပါတယ်။

လာမယ့် စက်တင်ဘာ လလယ်ပိုင်းမှာ ကုလသမဂ္ဂရဲ့အထွေထွေညီလာခံကို ကျင်းပဖို့ရှိနေတာဖြစ်ပြီး အဲဒီညီလာခံကို ကိုယ်စားလှယ်အဖြစ် တက်ရောက်နိုင်ဖို့ NUG နဲ့ စစ်ကောင်စီတို့ အားပြိုင်နေကြတာဖြစ်ပါတယ်။

Public Service Announcement

ဒါကြောင့် အဲဒီ ညီလာခံကို စစ်အာဏာသိမ်းတာကို ဆန့်ကျင်တဲ့ သံအမတ်ကြီး ဦးကျော်မိုးထွန်း ဆက်လက်တက်ရောက်နိုင်ဖို့အတွက် ထောက်ခံတဲ့ အွန်လိုင်းလက်မှတ်ရေးထိုးလှုပ်ရှားမှုကို ပြုလုပ်နေတာလည်းဖြစ်ပါတယ်။

လက်မှတ်ရေးထိုးလှုပ်ရှားမှုမှာ ကမ္ဘာ့တလွှားက မြန်မာတွေအပြင် အရှေ့တီမောနိုင်ငံ ငြိမ်းချမ်းရေးနိုဘယ်လ်ဆုရှင်ဖြစ်သူ သမ္မတဟောင်း Mr. Jose Ramos – Horta ၊ မြန်မာနိုင်ငံဆိုင်ရာ အမေရိကန် သံအမတ်ကြီးဟောင်း ဒဲရစ်မေချယ်တို့အပါအဝင် စတဲ့ ထင်ရှားသူတွေလည်းပါဝင်လက်မှတ်ရေးထိုးတယ်လို့သိရပါတယ်။