မန္တလေးတိုင်း မိုးကုတ်မြို့တွင် ယနေ့နံနက်က မြေပြိုမှုဖြစ်ပွားရာ နေအိမ်သုံးလုံးပျက်စီးပြီး လူ၁၁ဦးပျောက် ဆုံးနေရာမှ ကလေးနှစ်ဦး၏ရုပ်အလောင်းရှာတွေ့ထားကြောင်းဒေသခံများက ပြောသည်။
မိုးကုတ်မြို့အနောက်ပိုင်း အောင်သစ်လွင်ရပ်ကွက်တွင် ယနေ့(သြဂုတ်၂၄ ရက်)နံနက် ၆ နာရီခန့်က မြေပြိုမှုဖြစ်ပွားခဲ့ခြင်းဖြစ်ပြီး နေအိမ်သုံးလုံးပြိုပျက်ခဲ့ရာ အဆိုပါလူနေအိမ်များအတွင်းနေထိုင်သော လူ၁၁ ဦး ပြိုကျသည့်အထဲပါသွားကြောင်း၊ ကယ်ဆယ်ရေးလုပ်ငန်းများဆောင်ရွက်ခဲ့ရာ ၂ နာရီခန့်အကြာတွင် ကလေးရုပ်အလောင်းနှစ်လောင်း တွေ့ရှိထားကြောင်း ဒေသခံများက ပြောသည်။
မိုးကုတ်မြို့တွင် မိုးတွင်းကာလမြေပြိုမှုနှင့်ကျောက်တွင်းပြိုကျမှုများ နှစ်စဥ်ဖြစ်ပွားနေပြီး သြဂုတ်လဆန်းပိုင်းကလည်း ချောင်းရေလျှံကာမြေပြိုမှုကြောင့် လူသုံးဦးသေဆုံးခဲ့ပြီး ကျောက်တွင်းပြိုကျမှုကြောင့်လည်း လူတစ်ဦးသေဆုံးခဲ့သည်။
