အမျိုးသားဒီုမိုကရေစီအဖွဲ့ချုပ်(NLD)က ဇူလိုင်လအတွင်းက ပြုလုပ်ခဲ့သည့် တရုတ်ကွန်မြူနစ်ပါတီ နှစ် ၁၀၀ပြည့် အထိမ်းအမှတ် အပေါ် ဝမ်းမြောက်ကြောင်း သဝဏ်လွှာပို့သည့်အပေါ် တရုတ်ကွန်မြူ နစ်ပါတီကလည်း ကျေးဇူးတင်လွှာပြန်လည်ပို့ဆောင်ခဲ့သည်။
အမျိုးသားဒီမိုကရေစီအဖွဲ့ချုပ် ဗဟိုအလုပ်အမှုဆောင်ကော်မတီ ပြည်ထောင်စုသမ္မတမြန်မာနိုင်ငံတော် ရန်ကုန်ဟု နိုင်ငံတကာရေးရာဌာန တရုတ်ကွန်မြူနစ်ပါတီဗဟိုကော်မတီ ပေကျင်းက ကျေးဇူးတင်လွှာ ပေးပို့ခဲ့ခြင်ဖြစ်သည်။ မြန်မာ၊ တရုတ် နှစ်ဘာသာဖြင့်ဖော်ပြထားသည့် အဆိုပါ ကျေးဇူးတင်လွှာကို NLD ၏ သတင်းနှင့်ပြန်ကြားရေး ဒီလှိုင်းက တစ်ဆင့် ယနေ့ ဩဂုတ် ၂၅ရက်တွင် ထုတ်ပြန်ခဲ့သည်။
ယင်းကျေးဇူးတင်လွှာတွင် “အဆွေတော်ပါတီသည် တရုတ်ကွန်မြူနစ်ပါတီ နှစ် (၁၀၀) ပြည့် အထိမ်းအမှတ်အပေါ် ဝမ်းမြောက်ကြောင်းသဝဏ်လွှာပေးပို့လာသည်ကို ကျေးဇူးဥပကာရတင်ရှိကြောင်း ဖော်ပြအပ်ပါသည်။ တရုတ်ကွန်မြူနစ်ပါတီ နှင့် မြန်မာနိုင်ငံ အမျိုးသးဒီမိုကရေစီအဖွဲ့ချုပ်သည် ခင်မင်ရင်းနှီးစွာ ပေါင်းသင်းဆက်ဆံခဲ့ကြပြီး တရုတ် -မြန်မာ ဆက်ဆံရေး ချောမောစွာ ဖွံ့ဖြိုးတိုးတက်ရေးအတွက် အရေးကြီးသည့် အခန်းကဏ္ဍမှ ပါဝင်ကြပါသည်” ဟု ရေးသားထားသည်။
ထို့ပြင် “ကျွန်တော်တို့သည် အဆွေတော်အမျိုးသားဒီမိုကရေစီအဖွဲ့ချုပ်နှင့်အတူ တရုတ် -မြန်မာ ဆက်ဆံရေး ၀ိုင်းဝန်းစောင့်ရှောက်ပြီး နှစ်နိုင်ငံ ဆက်ဆံရေး ဆက် လက်တိုးတက်အောင် လက်တွဲပူးပေါင်း ဆောင်ရွက်ခြင်းဖြင့် နှစ်နိုင်ငံ ပြည်သူများထံသို့ ကောင်းကျိုးပိုမိုသယ်ပိုးရန် ဆန္ဒပြုအပ်ပါသည်” ဟု ရေးသားခဲ့သည်။
Public Service Announcement
အဆိုပါ စာနှင့်ပတ်သက်ပြီး NLD ဗဟိုအလုပ်အမှု ဆောင်အဖွဲ့ဝင် ဦးအောင်ကြည်ညွန့်က “ပြီးခဲ့တဲ့ကာလများမှာ NLD နဲ့ CCP တိုကြား ချစ်ကြည်ရင်းနှီးတဲ့ ဆက်ဆံမှုတွေရှိခဲ့ပြီး နှစ်နိုင်ငံအကျိုးစီးပွားနဲ့ ဒေသတွင်းပူးပေါင်းဆောင်ရွက်မှုတွေ ရှိတာကြောင့် တရုတ်ကွန်မြူနစ်ပါတီရဲ့ နှစ်တစ်ရာပြည့်အခမ်းအနားမှာ NLD ပါတီက ဝမ်းမြောက်ကြောင်း သဝဏ်လွှာပေးပို့ခဲ့တဲ့အပေါ် ပြန်ကြားလာတာဖြစ်ပါတယ်။ နှစ်နိုင်ငံပြည်သူတွေရဲ့ အကျိုးစီးပွားကို ရှေ့ရှုတဲ့ ဆက်ဆံရေးမျိုးကို ဦးတည်တဲ့ သဘောထားဖြစ်လို့ လေးစားပါတယ်” ဟု ပြောကြားခဲ့ကြောင်း ဒီလှိုင်းက ဖော်ပြခဲ့သည်။
လက်ရှိ တရုတ်သမ္မတ ရှီကျင့်ဖျင်သည်တရုတ်ကွန်မြူနစ်ပါတီ ဗဟိုကော်မတီအထွေထွေအတွင်း ရေးမှူးချုပ် အဖြစ် တာဝန်ယူထားသူဖြစ်သည်။ တရုတ်နိုင်ငံ အနေဖြင့် အာဏာသိမ်းစစ်ကောင်စီနှင့် ထိတွေ့ဆက်ဆံမှု ပြုလုပ်နေသည့်နိုင်ငံ လည်းဖြစ်သည်။
