တောင်ကြီးမြို့ ဩဂုတ် ၂၉ ရက်ညက ဗုံးပေါက်ကွဲမှုသည် ရှမ်းပြည်ဖက်ဒရယ် တပ်ဦး -SSFFက အဏာသိမ်းစစ်ကောင်စီတပ်အား တိုက်ခိုက်ခဲ့ခြင်းဖြစ်ကြောင်း SSFF က ယနေ့ သတင်းထုတ်ပြန်သည်။
သြဂုတ် ၂၉ ရက်ညတွင် တောင်ကြီးမြို့ တန်ဆောင်တိုင်ကွင်းအရှေ့ဘက်ရှိ စစ်ကောင်စီတပ်ကို လက်လုပ်ဗုံးနှစ်လုံးဖြင့် ၁၀မိနစ်ခြားကာ ခြိမ်းခြောက်တိုက်ခိုက်ခဲ့ခြင်းဖြစ်ပြီး ၊ SSFF အနေဖြင့် ရှေ့ဆက်လျှောက်တွင်လည်း ပြည်သူများ၏ ဘုံရန်သူဖြစ်သော မင်းအောင်လှိုင်ဦး ဆောင်သည့် အကြမ်းဖက်သမား စစ်ကောင်စီလက်အောက်ခံတပ်များကို ရှမ်းပြည်အနှံ့တွင်အဓိကထားပြီး ဆက်လက်တိုက်ခိုက်သွားမည်ဖြစ်သည်ဟုဖော်ပြထားသည်။
ရှမ်းပြည်ဖက်ဒရယ် တပ်ဦး SSFF သည် ယခင်တွင် ပြုလုပ်ခဲ့သည့် လှုပ်ရှားမှုများအား ကြေညာခြင်းမပြုခဲ့သော်လည်း စစ်ကောင်စီတပ်များသည် ဗုံးခွဲတိုက်ခိုက်ခံရမှုကြောင့် မဆိုင်သည့် ပြည်သူများအား ဖမ်းဆီးခြင်းများပြုလုပ်သောကြောင့် ယခုကဲ့သို့ ကြေညာခြင်းဖြစ်သည်ဟုလည်းပါရှိသည်။
စစ်ကောင်စီတပ်ကို ဗုံးဖြင့် ၂ လုံးခွဲကာတိုက်ခိုက်မှုကြောင့် စစ်ကောင်စီတပ်ဖွဲ့ဝင်များ ထိခိုက်မှုရှိနိုင်သော်လည်း အရေအတွက်ကို မသိရကြောင်း ဒေသခံတစ်ဦးကပြောသည်။ ဗုံးကွဲပြီးနောက် စစ်ကောင်စီတပ်က တွေ့ရာ မြို့ခံလူငယ်လေးဦးကိုဖမ်းဆီးသွားကြောင်းလည်း ဒေသခံအချို့က ပြောသည်။
Public Service Announcement
