ကရင်ပြည်နယ် ကြာအင်းဆိပ်ကြီးမြို့နယ် ပိုင်ကလာဒုံကျေးရွာအနီးမှာ ဒီကနေ့မနက်ပိုင်းက ပစ်ခတ်မှုတွေဖြစ်ပွားနေပါတယ်။
အကြမ်းဖက်စစ်ကောင်စီတပ်ဖွဲ့တွေ ကေအဲန်ယူနယ်မြေထဲ ကျူးကျော်ဝင်ရောက်ပြီး စစ်ရေးလှုပ်ရှားမှုတွေလုပ်ဆောင်နေတာဖြစ်ပါတယ်။
စစ်ကောင်စီတပ် တွေဟာ မနေ့ညပိုင်းက ကြိတ်ကျေးရွာကနေတစ်ဆင့် ပိုင်ကလာဒုံကျေးရွာဘက်ကို ဦးတည်ထွက်ခွာသွားခဲ့တာဖြစ်ပြီး ဒီကနေ့ မနက် ၇ နာရီအချိန်မှာတော့ ကြိတ်နဲ့ ပိုင်ကလာဒုံကြားက မိုက်ကလိန်ချောင်းမှာ နယ်မြေခံ KNLA တပ်နဲ့ တိုက်ပွဲဖြစ်ပွားခဲ့တာပါ။
“လက်နက်ကြီး လက်နက်ငယ်ပစ်ခတ်သံတွေရော ကြိတ်ကနေကြားရတယ်။ ကြိတ်နဲ့ ပိုင်ကလာဒုံဆို တစ်မိုင်လောက်ပဲဝေးတယ်” လို့ ဒေသခံတစ်ဦးကပြောပါတယ်။
Public Service Announcement
ပိုင်ကလာဒုံမှာ သွားရောက်အခြေချနေထိုင်မယ့် အကြမ်းဖက်စစ်အုပ်စုတပ်ရဲ့ နယ်မြေကျူးကျော်ဝင်ရောက်လာမှုကို နယ်မြေခံ KNLA တပ်ကတော့ လုံးဝခွင့်ပြုသွားမှာ မဟုတ်ဘူးလို့ ပြောထားပါတယ်။
အကြမ်းဖက်စစ်အုပ်စုတွေ အခုလို ကေအဲန်ယူထိန်းချုပ်နယ်မြေထဲ ကျော်လွန်ရောက်ရှိလာတဲ့အတွက် နယ်မြေခံ KNLA တပ်နဲ့ နှစ်ဖက်ပစ်ခတ်မှုတွေ ပိုမိုဖြစ်ပွားလာနိုင်တာကြောင့် ဒေသခံတွေ ကြိုတင်တိမ်းရှောင်နေရပြီ ဖြစ်ပါတယ်။
