မြန်မာအပါအဝင် အရှေ့တောင်အာရှနှင့် အာဖရိကတွင် ကိုဗစ်ကာကွယ်ဆေးတစ်မျိုးဖြစ်သည့် COVISHIELD ဆေးအတုများတွေ့ရှိရကြောင့် ကမ္ဘာ့ကျန်းမာရေးအဖွဲ့(WHO)ကိုကိုးကားပြီး အမျိုးသားညီညွတ်ရေးအစိုးရ(NUG)၏ ကျန်းမာရေးဝန်ကြီးဌာနက အသိပေးချက်ထုတ်ပြန်သည်။
COVISHIELD ကာကွယ်ဆေးထုတ်လုပ်သည့် အိန္ဒိယအခြေစိုက် Serum Institute of India Pvt. Ltd ကလည်း အထက်ပါဆေးအတုများတွေ့ရှိခြင်းကို အတည်ပြုထားသည်ဟု ထုတ်ပြန်ချက်က ဆိုသည်။
အဆိုပါကာကွယ်ဆေးအတုများတွေ့ရှိရသည့်နိုင်ငံများမှာ ယူဂန်ဒါ၊ အိန္ဒိယ၊ မြန်မာတို့ဖြစ်ပြီး ကာကွယ်ဆေးထိုးနှံမည့်သူများအဆင့်တွင် တွေ့ရှိခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြသည်။
ဆေးအတုများသည် ကမ္ဘာတစ်ဝှမ်း ပြည်သူ့ကျန်းမာရေးလုပ်ငန်းများအား ဆိုးရွားစွာထိခိုက်စေပြီး ကပ်ရောဂါကို ကာကွယ်တွန်းလှန်နေရသည့် ပြည်သူလူထုနှင့် ကျန်းမာရေးစနစ်အပေါ် ပိုမိုအန္တရာယ်ဖြစ်စေကြောင်း ထောက်ပြထားသည်။
ထို့ကြောင့် ပြည်သူလူထုအနေဖြင့် ကာကွယ်ဆေးများကို တရားဝင်လိုင်စင်ရရှိထားသောဖြန့်ဖြူးသူများမှ ရယူရန်၊ ကာကွယ်ဆေးစစ်မှန်မှုနှင့် အအေးလမ်းကြောင်းစနစ်မှန်ကန်မှုတို့ကို စစ်ဆေးရန်၊ သံသယရှိပါက ကျန်းမာရေးဝန်ထမ်း/ ပညာရှင်များထံမှ အကြံဉာဏ်ရယူရန်၊ ဆေးတုအသုံးပြုုမိကာ နောက်ဆက်တွဲပြဿနာများဖြစ်ပွားလာပါက နီးစပ်ရာကျန်းမာရေးဌာနတွင် ဆေးကုသမှုခံယူရန်နှင့် သတင်းပို့ရန်နှင့် ဆေးထိုးပြီးနောက်ဆက်တွဲ ပြဿဿနာများမဖြစ်ပွားသည့်တိုင် ကာကွယ်ဆေး၏ အာနိသင်မရရှိနိုင်သောကြောင့် ယုံကြည်စိတ်ချရသော COVID-19 ကာကွယ်ဆေးကို အကြိမ်ပြည့်ထပ်မံထိုးနှံရန် NUG က အကြံပြုထားသည်။