ကချင်ပြည်နယ်နှင့် စစ်ကိုင်းတိုင်းအစပ်ရှိ အကြမ်းဖက်စစ်ကောင်စီတပ်စခန်းကို ကချင်လက်နက်ကိုင်အဖွဲ့ (KIA)က ယနေ့ နံနက်တွင် ဝင်ရောက်တိုက်ခိုက်ခဲ့၍ တိုက်ပွဲ ပြင်းထန်လျက်ရှိကြောင်း ဒေသခံများက ပြောသည်။
ဟုမ္မလင်းမြို့နယ်ရှိ နမ့်သာ ဒေသ၌ စက်တင်ဘာ ၇ရက် နံနက် ၁၀နာရီမှစ၍ တိုက်ပွဲဖြစ်ပွားနေခြင်းဖြစ်သည်။
“လောလောဆယ် KIA ကထိုးစစ်ဆင်တဲ့ သဘောမျိုးလို့ ပြောတယ်။ စစ်ကောင်စီတပ်စခန်းကို ထိုးစစ်ဆင်လာတဲ့သဘော။ အထိအခိုက်တော့ လောလောဆယ် မကြားရသေးဘူး။ တိုက်ပွဲကတော့ တော်တော်ပြင်းထန်တယ်လို့ကြားတယ်” ဟု ဒေသခံက ပြောသည်။
အမျိုးသားညီညွတ်ရေးအစိုးရ(NUG)က စစ်အာဏာရှင်ဆန့်ကျင်ရေး ပြည်သူလူထု၏ ခုခံတွန်းလှန်စစ် စတင်ကြောင်း ကြေညာလိုက်ခြင်းကြောင့် KIAက ထိုးစစ်ဆင်ခြင်းဖြစ်နိုင်ကြောင်း ဒေသခံက ပြောကြားသည်။
Public Service Announcement
“ ကျွန်တော်တို့ ခန္တီး၊ ဟုမ္မလင်းကို သူတို့အနေနဲ့ လှုပ်ရှားမယ်လို့ မြင်တယ်။ ဘာဖြစ်လို့လည်းဆိုရင် ဒါကအစပ်ဖြစ်နေတာ။ ကချင်ပြည်နယ်ကဆိုရင် KIA အနေနဲ့ ခန္တီး၊ ဟုမ္မလင်းက သွားလာမှု အရမ်းလွယ်ကူတယ်” ဟု ၎င်း ကဆက်ပြောသည်။
စစ်ကောင်စီတပ်အနေဖြင့်လည်း ဟုမ္မလင်းနှင့် ခန္တီးမြို့ပေါ်၌ လုံခြုံရေးအင်အားများ တိုးမြှင့်ထားသည်မှာ ၂ရက်ရှိပြီဖြစ်ကြောင်း ဒေသခံက ပြောသည်။
ပြီးခဲ့သည့်လအတွင်းကလည်း ဟုမ္မလင်းမြို့နယ်တွင် စစ်ကောင်စီတပ်ကို ရှမ်းနီလက်နက်ကိုင်တပ်ဖွဲ့(SNA)က တိုက်ခိုက်ခဲ့၍ တိုက်ပွဲအချို့ဖြစ်ပွားခဲ့သည်။
KIA က ကချင်ပြည်နယ်အတွင်း၌ စစ်ကောင်စီတပ်စခန်းများ၊ စစ်ကြောင်းများ၊ ယာဉ်တန်းများကို တိုက်ခိုက်နေသည့်အပြင် စစ်ကိုင်းတိုင်းဒေသအချို့နှင့် ရှမ်းမြောက်ဒေသများတွင်လည်း စစ်ကောင်စီတပ်ကို တိုက်ခိုက်လျက်ရှိသည်။
ပုံစာ – ရှေ့တန်းစစ်မြေပြင်တစ်နေရာ မှ KIA တပ်သားတစ်ဦး ကို ၂၀၁၂ ခုနှစ်က တွေ့ရစဥ်။
