အာဏာလုအကြမ်းဖက်စစ်ကောင်စီတပ်များသည် ယခု စက်တင်ဘာလဆန်းပိုင်းမှစ၍ ယခင်လများ ထက်စစ်ရေးလှုပ်ရှားမှု ပိုလုပ်ဆောင်လာ၍ ဖာပွန်ခရိုင်(မူတြော်ခရိုင်) အတွင်း တိုက်ပွဲများ ဆက်ဖြစ်နေကြောင်း ကရင်အမျိုးသားအစည်းအရုံး(KNU) တပ်မဟာ(၅)၏ Mutraw Newsက ယနေ့ သတင်းထုတ်ပြန်သည်။
စက်တင်ဘာ ၁ရက်မှ ၁၅ရက်အတွင်း တိုက်ပွဲ ၁၂၂ကြိမ်ဖြစ်ပွားခဲ့ကြောင်း ထုတ်ပြန်ထားပြီး ယင်းတိုက်ပွဲများ၌ စစ်ကောင်စီတပ်မှ ၇၀ ဦးသေဆုံးကာ ၉၁ဦးဒဏ်ရာရခဲ့ကြောင်း ထုတ်ပြန်ထားပြီး ယင်းနောက်ပိုင်း၌လည်း တိုက်ပွဲများ ဆက်လက်ဖြစ်ပွားလျက်ရှိသည်ဟုဆိုသည်။
စက်တင်ဘာ ၂၀ရက်တွင် စစ်ကောင်စီတပ်နှင့် တိုက်ပွဲ ၂ကြိမ်ဖြစ်ပွားခဲ့ရာ စစ်ကောင်စီတပ်မှ ၁ဦးသေဆုံးပြီး တစ်ဦး ဒဏ်ရာရခဲ့ကြောင်း တပ်မဟာ(၅)က ယနေ့ထုတ်ပြန်သည်။
စက်တင်ဘာ ၁ရက်မှ ၂၀ရက်အတွင်း တိုက်ပွဲများ၌ KNU တပ်မဟာ(၅)ဘက်မှလည်း ကျဆုံးသူအချို့နှင့် ထိခိုက်ဒဏ်ရာရသူအချို့ရှိခဲ့သည်ဟု ဆိုသည်။
KNU တပ်မဟာ ၇ခုရှိသည့်အနက် လတ်တလောတွင်၊ တပ်မဟာ(၁)၊ တပ်မဟာ(၃)နှင့် တပ်မဟာ(၆) ဒေသများ၌လည်း တိုက်ပွဲဖြစ်ပွားမှုများရှိနေသည်။