အမျိုးသားညီညွတ်ရေးအစိုးရ နိုင်ငံခြားရေးဝန်ကြီးဒေါ်ဇင်မာအောင်ဦးဆောင်တဲ့အဖွဲ့ဟာ အမေရိကန်နိုင်ငံခြား ရေးဝန်ကြီးဌာန တာဝန်ရှိသူတွေနဲ့ ဒီနေ့တွေ့ဆုံကာ မြန်မာ့အရေးကိစ္စတွေကို ဆွေးနွေးခဲ့တယ်လို့ အမျိုးသားညီညွတ်ရေးအစိုးရ(NUG)က သတင်းထုတ်ပြန်ပါတယ်။
ကုလသမဂ္ဂဌာနချုပ်ရှိရာ အမေရိကန်၊ နယူးယောက်မြို့မှာ အထွေထွေညီလာခံကျင်းပနေပြီး ညီလာခံအစည်း အဝေးကာလမှာ NUG နိုင်ငံခြားရေးဝန်ကြီး ဒေါ်ဇင်မာအောင်နဲ့ အမေရိကန်နိုင်ငံခြားရေးဝန်ကြီးဌာန အတိုင်ပင် ခံ Mr. Derek Chollet တို့ဟာ အွန်လိုင်းကနေ တွေ့ဆုံဆွေးနွေးခဲ့ ကြတာပါ။
အဲဒီတွေ့ဆုံမှုမှာ မြန်မာ့နိုင်ငံအခြေအနေ၊ လူ့အခွင့်အရေးအခြေအနေ၊ လူသားချင်းစာနာထောက် ထားမှုဆိုင်ရာ အခြေအနေတွေနဲ့ COVID-19 ကာကွယ်ဆေးအကူအညီပေးရေးဆိုင်ရာ အခြေအနေတွေကို ဆွေးနွေးခဲ့တယ်လို့ NUG က ထုတ်ပြန်ပါတယ်။
ဆွေးနွေးပွဲကို လူ့အခွင့်အရေးဆိုင်ရာဝန်ကြီး ဦးအောင်မျိုးမင်း၊ နိုင်ငံခြားရေးဒုတိယဝန်ကြီး ဦးမိုးဇော်ဦး၊ ကုလသမဂ္ဂဆိုင်ရာမြန်မာသံအမတ်ကြီး ဦးကျော်မိုးထွန်း၊ လူအခွင့်အရေးဝန်ကြီးဌာန အကြံပေးအဖွဲ့ဝင် ဦးအောင်ကျော်မိုးတို့လည်း တက်ရောက်ခဲ့ပါတယ်။
Public Service Announcement
မြန်မာသံအမတ်ကြီး ဦးကျော်မိုးထွန်းဟာ လက်ရှိ ကျင်းပနေဆဲ ကုလသမဂ္ဂအထွေထွေညီလာခံနဲ့ အဆင့်မြင့်အရာရှိများအဆင့် မျက်နှာစုံညီအစည်းအဝေးတွေမှာ မြန်မာနိုင်ငံကိုယ်စားပြုအဖြစ် တက်ရောက်နေတာဖြစ်ပါတယ်။
NUG နိုင်ငံခြားရေးဝန်ကြီးဒေါ်ဇင်မာအောင်ဟာ ပြီးခဲ့တဲ့ဩဂုတ်လအတွင်း အမေရိကန်၊ နိုင်ငံခြားရေးဝန်ကြီး ဌာန ဒုတိယဝန်ကြီးနဲ့ အွန်လိုင်းကနေ မြန်မာ့အရေးဆွေးနွေးခဲ့ပြီး အမေရိကန်ဟာ မြန်မာ့ဒီမိုကရေစီအရေးအတွက် NUG အပါအဝင် အရပ်ဖက်အဖွဲ့အစည်းတွေ၊ တိုင်းရင်းသား အင်အားစုတွေနဲ့ ထိတွေ့ဆက်ဆံသွားမယ်လို့ ကြေညာထားပါတယ်။
