ကမ္ဘာ့ကုလသမဂ္ဂနှင့် မဟာမိတ်အဖွဲ့များပူးပေါင်း၍ မြန်မာနိုင်ငံအတွက် ကိုဗစ်ကာကွယ်ဆေး ၆ ဒဿမ ၂ သန်းပေးအပ်သွားမည်ဖြစ်ကြောင်း ယင်းအဖွဲ့များက ယနေ့ (စက်တင်ဘာ ၃၀တွင်)ပူးတွဲထုတ်ပြန်သည်။
ကုလသမဂ္ဂနှင့် မိတ်ဖက်အဖွဲ့များ၏ COVID-19 ကာကွယ်ဆေးထိုးခြင်း အရှိန်အဟုန်မြှင့်ရန် ကြိုးပမ်းမှုတစ်ရပ်အနေဖြင့် COVAX1 ပံ့ပိုးမှုနှင့် မြန်မာနိုင်ငံအတွက် COVID-19 ကာကွယ်ဆေး ၆ ဒသမ ၂ သန်းကို ဦးစွာပဏာမခွဲဝေပေးထားပြီး ၎င်းကာကွယ်ဆေးများကို WHO ၏ ဦးစားပေးလမ်းညွှန်ချက်များနှင့်အညီ ဖြန့်ဝေရပါမည် ဖြစ်သည်ဟု ထုတ်ပြန်ချက်တွင် ဖော်ပြသည်။
ကာကွယ်ဆေးအတွက် သင့်လျော်သော အအေးခန်းများထားရှိနိုင်မှုနှင့် တာဝန်ထမ်းဆောင်မည့် ကျန်းမာရေးစောင့်ရှောက်မှုလုပ်သားများ၏ လုံခြုံရေး အာမခံချက်များအပေါ်တွင် မူတည်ပြီး အဓိကတာဝန်ရှိသည့် သက်ဆိုင်သူများနှင့် တွေ့ဆုံဆွေးနွေးမှုများ လုပ်ဆောင်နေကြောင်း ထုတ်ပြန်ချက်က ဆိုသည်။အဓိကတာဝန်ရှိသည့် သက်ဆိုင်သူများနှင့်တွေ့ဆုံဆွေးနွေးနေသည်ဟုဖော်ပြသော်လည်း မည်သည့်အဖွဲ့အစည်းဖြစ်သည်ကို အသေးစိတ်ဖော်ပြထားခြင်းမရှိပေ ။
အထက်ပါကိစ္စနှင့်စပ်လျဉ်း၍ GAVI, UNICEF နှင့် WHO တို့သည် လူသားချင်းစာနာမှုဆိုင်ရာအထောက်အပံ့၏ အဓိကရည်မှန်းချက်ဖြစ်သော လူ့အသက်များအားကယ်တင်ခြင်းအား ဆက်လက်လုပ်ဆောင်သွားနိုင်ရန်နှင့် မြန်မာနိုင်ငံ၏ကာကွယ်ဆေးထိုးခြင်းစနစ် ပြန်လည်အသက်ဝင်စေရန် အတွက် ဦးတည်သော ပထမခြေလှမ်းတစ်ခုဖြစ်သည်ဟု ထုတ်ပြန်ချက်တွင် ထည့်သွင်းထားသည်။
တိုင်းရင်းသားကျန်းမာရေးအဖွဲ့အစည်းများနှင့် အမျိုးသားညီညွှတ်ရေးအစိုးရ(NUG) ၏ကျန်းမာရေးဝန်ကြီးဌာနတို့ ပူးပေါင်းဖွဲ့စည်းထားသော COVID-19 ကာကွယ်ထိန်းချုပ်ကုသရေးအဖွဲ့ (CTF)က စကွတင်ဘာ ၁၆ ရက်တွင်အချက် ၆ ချက်ပါသော မူဝါဒကိုထုတ်ပြန်ခဲ့ရာ မြန်မာနိုင်ငံတွင် ကိုဗစ်ရောဂါကိုထိန်းချုပ်နိုင်ရန်အတွက် ကုလအဖွဲ့အစည်းများအပါအဝင် မိတ်ဖက်အဖွဲ့အစည်းများ ၊အလှူရှင်နိုင်ငံများအနေဖြင့် NUG ကိုသော်လည်းကောင်း ၊စစ်ကောင်စီကိုသော်လည်းကောင်း ၊တိုင်းရင်းသားအဖွဲ့အစည်းများကိုသော်လည်းကောင်းညီမျှစွာဆက်ဆံရန်လိုအပ်ကြောင်းဖော်ပြထားသည်။ထို့အပြင်စစ်ကောင်စီကိုဆက်ဆံရာတွင်လည်း လုပ်ငန်းသဘောအရသာဖြစ်ပြီး အသိ့အမှတ်ပြုသည့်သက်ရောက်မှုမဖြစ်စေရန် သတိ့ပြုရမည်ဟု ထောက်ပြထားသည်။ကာကွယ်ဆေးသယ်ဆောင်ခြင်း ၊ထိုးနှံခြင်းတို့နှင့်ပတ်သပ်၍ လည်းအာဏာသိမ်ယ စစ်ကောင်စီက မနှောက်ယှက်စေရန် အသေးစိတ် အကြံပြုထားပြီး တတိယအဖွဲ့အစည်းအနေဖြင့် ဆေးထိုးနှံပေးရန် တောင်းဆိုထားသည်ကိုလည်းတွေ့ရသည်။
NUG နှင့်တိုင်းရင်းသားကျန်းမာရေးအဖွဲ့အစည်းများပူးပေါင်းဖွဲ့စည်းထားသောအမျိုးသားကျန်းမာရေးကော်မတီက ကိုဗစ်ကာကွယ်ဆေး များရရှိအောင်UNအေဂျင်စီများ ၊အမေရီကန် ၊တရုတ် ၊ပြင်သစ်၊သြစတြေးလျ၊ ဂျပန် စသောနိုင်ငံများမှ အကူအညီများတောင်းခံခဲ့ပြီး အချို့ဆေးများမှာရရှိနေပြီဖြစ်ကြောင်းလည်း ကျန်းမာရေးဝန်ကြီး ဒေါင်တာဇော်ဝေစိုး ကပြောကြားထားသည်။
“အခုအချိန်မှာဆိုရင် အဲဒီအကူအညီတွေရနေပြီ ။ ရလာတဲ့အကူအညီတွေကိုလည်းပဲ တတိယအဖွဲ့အစည်းအနေနဲ့ UNICEF တို့ UNIOPS တို့ ၊GAVI တို့လို တတိယအဖွဲ့အစည်းတွေအနေနဲ့ပေးဖို့ ။ ဘာလို့လဲဆိုတော့တတိယအဖွဲ့အစည်းအနေနဲ့လုပ်မှသာလျှင် အန္တရာယ်လည်းကင်းတဲ့အပြင် စိတ်ချယုံကြည်မှုရအောင်။ UN အထွဲ့အစည်းတွေအနေနဲ့ ကာကွယ်ဆေးထိုးခွင့်ဆိုတဲ့ -Right to Vaccine ။ပြည်သူတွေကာကွယ်ဆေးထိုးရဖို့ အဓိကဆိုတဲ့ မူကိုကိုင်စွဲပြီးတော့ တောင်းဆိုခဲ့တဲ့အတွက်
အခုဆိုရင်ကာကွယ်ဆေးဗမာပြည်ကို စပြီးရောက်ရှိလာနေပြီ ။ စတင်ပြီးတော့လည်း ထိုးနှံမှုတွေ လုပ်နေပြီ ။ ရှေ့လျှောက်ပြီးတော့လည်း ရောက်လာလိမ့်မယ်လို့ ဆရာ့အနေနဲ့ ပြည်သူကို အသိ့ပေးချင်ပါတယ်” ဟု ဒေါက်တာဇော်ဝေစိုးက COVID-19 ကာကွယ်ဆေးရအောင်ကြိုးစားထားမှုအခြေအနေကိုပြောသည်။
ကာကွယ်ဆေးထောက်ပံ့မည့်အစီအစဉ်ပူးတွဲထုတ်ပြန်သည့်အဖွဲ့အစည်းများတွင် ကမ္ဘာ့ကျန်းမာရေးအဖွဲ့(WHO)မှဖွဲ့စည်းသည့် COVAX ၊ ကာကွယ်ဆေးထိုးခြင်းနှင့် ကမ္ဘာလုံးဆိုင်ရာကာကွယ်ဆေးထိုးနှံရေးမဟာမိတ်အဖွဲ့ (GAVI)၊ ကူးစက်ရောဂါကြိုတင်ပြင်ဆင်မှု ဆန်းသစ်တီထွင်မှုများအဖွဲ့(CEPI) စသည်တို့မှာ ပြည်သူ့အစိုးရ (၂၀၁၆-၂၀၂၀ အစိုးရ)လက်ထက်၌ ကိုဗစ်ကာကွယ်ဆေးအတွက် စတင်ချိတ်ဆက်ဆွေးနွေးခဲ့သည့် အဖွဲ့အစည်းများလည်း ဖြစ်သည်။
ထို့အပြင် ယနေ့အထိ လူဦးရေ၏ ၆ဒသမ၈ ရာခိုင်နှုန်းသာ COVID-19 ကာကွယ်ဆေးနှစ်ကြိမ် ထိုးထားပြီး ၁၃.၁ ရာခိုင်နှုန်းမှာ အနည်းဆုံး တစ်ကြိမ်ထိုးထားသောကြောင့် ကာကွယ်ဆေးထိုးခြင်းကို ကျယ်ကျယ်ပြန့်ပြန့် လုပ်ဆောင်နိုင်ခြင်းမရှိပါက ရောဂါကူးစက်မှုကာကွယ်နိုင်ခြင်းအခြေအနေ တိုးတက်စေမှုအားနှောင့်နှေးစေနိုင်ကြောင်းလည်း မဟာမိတ်အဖွဲ့များက သတိပေးထားသည်။
မြန်မာနိုင်ငံအနေဖြင့် အရှေ့တောင်အာရှနိုင်ငံများနှင့် နှိုင်းယှဉ်လျှင် ရောဂါစစ်ဆေးထိန်းချုပ်နိုင်မှု အကန့်အသတ်ရှိခြင်း COVID ကာကွယ်ဆေးထိုးပေးနိုင်မှုနည်းပါးခြင်းတို့ကြောင့် COVID-19 ရောဂါအပြင်းအထန်ပျံ့နှံ့ခြင်းကို ဖြစ်ပွားစေခဲ့သည်ဟု ကုလနှင့် မဟာမိတ်အဖွဲ့များက ထောက်ပြသည်။
လက်ရှိအခြေအနေတွင် မြန်မာနိုင်ငံ၌ COVID-19 ရောဂါကူးစက်ခံရသူ ၄၆၀,၀၀၀ ကျော်ရှိပြီး ယင်းအနက် ၁၈,၀၀၀ ကျော် သေဆုံးခဲ့ကြောင်း အစီရင်ခံစာတစ်ခုကိုကိုးကားပြီး ပူးပေါင်းထုတ်ပြန်ချက်တွင် ဖော်ပြသည်။သို့သော်အာဏာသိမ်းစစ်ကောင်စီကြောင့် ကိုဗစ်တတိယလှိုင်းတွင်ပင်သေဆုံးသူပြည်သူသိန်းနှင့်ချီနိုင်ကြောင်းထောက်ပြမှုများလည်းရှိသည်။