စစ်တပ်အာဏာသိမ်းမှု​ကြောင့် ကုန်သွယ်မှုပမာဏ ယမန်နှစ်ထက် ​ကန်ဒေါ်လာခုနစ်ဘီလီယံ ​လျော့နည်း၊ စာရင်းမှန်မဟုတ်ဘဲ ပိုမို​လျော့နည်းနိုင်ဟု လုပ်ငန်းရှင်တစ်ဦး​ပြော

စစ်တပ်အာဏာသိမ်းမှုကြောင့် မြန်မာနိုင်ငံ၏ ကုန်သွယ်မှုပမာဏသည် ယမန်နှစ်ထက် ကန်ဒေါ်လာခုနစ်ဘီလီယံခွဲကျော် လျော့နည်းသွားကြောင်း စစ်ကောင်စီထိန်းချုပ်ထားသည့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ထုတ်ပြန်သောစာရင်းများတွင်ဖော်ပြထားသည်။

စစ်တပ်အာဏာမသိမ်းခင် ၂၀၁၉-၂၀၂၀ဘဏ္ဍာနှစ်တွင်(၂၀၁၉ အောက်တိုဘာ ၁ရက်မှ ၂၀၂၁ စက်တင်ဘာ ၃၀ရက်အထိ) ကုန်သွယ်မှုဒေါ်လာ ၃၆ ဘီလီယံကျော်ရှိပြီး စစ်တပ်အာဏာသိမ်းထားသည့် ၂၀၂၀-၂၁ ဘဏ္ဍာနှစ် (၂၀၂၀အောက်တိုဘာ ၁ရက်မှ ၂၀၂၁ စက်တင် ဘာ၃၀ရက်အထိ) တွင် ကုန်သွယ်မှုသည် ကန်ဒေါ်လာ ၂၈ ဘီလီယံသာရှိသည်ဟု စစ်ကောင်စီထိန်းချုပ်ထားသည့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ထုတ်ပြန်သော စာရင်းများတွင် ဖော်ပြထားသည်။

ဘဏ္ဍာနှစ် နှစ်ခုကို နှိုင်းယှဉ်ပါက စစ်တပ်အာဏသိမ်းမူကြောင့် ကုန်သွယ်မှုပမာဏာ ၂၁ ရာခိုင်နှုန်းကျော် လျော့နည်းသွားခြင်းဖြစ်သည်။ ထိုသို့ကုန်သွယ်မူလျော့မူသည် ငါးနှစ်အတွင်း အနည်းဆုံးကုန်သွယ်မူ ပမာဏဖြစ်သည်။

စစ်တပ်အာဏာသိမ်းထားသည့် ၂၀၂၀-၂၁ဘဏ္ဍာနှစ်တွင် ပို့ကုန်တန်ဖိုးမှာ ၁၄ ဘီလီယံနှင့် သွင်းကုန်တန်ဖိုးမှာ ၁၄ ဘီလီယံရှိသည်ဟု စစ်ကောင်စီက ထုတ်ပြန်ထားသည်။ ၂၀၁၉-၂၀၂၀ ဘဏ္ဍာနှစ်တွင် ပို့ကုန်တန်ဖိုးမှာ ၁၇ ဘီလီယံခွဲကျော်ရှိပြီး သွင်းကုန်တန်ဖိုးမှာ ၁၉ဘီလီယံကျော်ရှိခဲ့သည်။ထိုကြောင့် ပို့ကုန် ၃ ဘီလီယံခွဲကျော်နှင့် သွင်းကုန်တန်ဖိုး ၅ ဘီလီယံကျော် လျော့နည်းခဲ့ခြင်းဖြစ်သည်။

Public Service Announcement

စစ်ကောင်စီ၏ ထုတ်ပြန်သော ဏိန်းဂဏန်းများသည် အရပ်သားအစိုးရလက်ထက်ကကဲ့သို့ စာရင်းမှန်များမဖြစ်နိုင်ကြောင်းနှင့် မြေပြင်အခြေအနေတွင် ထိုထက်ပိုမို လျော့ကျနိုင်သည်ဟု ပို့ကုန်လုပ်ငန်းရှင်တစ်ဦးကပြောသည်။

“ဒီကိန်းဂဏန်းတွေ မှန်လားဆိုတော့ လိမ်ညာနေတယ်ဆိုတာ မြေပြင်မှာ ဆင်းကြည့်ရင် သိနိုင်ပါတယ်။ နယ်စပ်ကကော၊ ပင်လယ်ရေကြောင်းကကော ပို့ကုန်တွေအကုန်လုံးရပ်နေတာပါ”ဟု ၎င်းက ​ပြောသည်။

စစ်ကောင်စီက ထုတ်ပြန်သော ၎င်းတို့အာဏာသိမ်းထားသည့် ဘဏ္ဍာနှစ်အတွက် ကုန်သွယ်မူကိန်းဂဏန်းများတွင် အရပ်သားအစိုးရလက်ထက် လေးလတာအတွင်း ၂၀၂၀ အောက်တိုဘာ ၁ ရက်မှ ၂၀၂၁ ဇန်နဝါရီအထိ ကုန်သွယ်မူ ပမာဏသည် ဒေါ်လာ ၁၀ ဘီလီယံကျော်ပါဝင်သေးသည်။ ထိုထဲတွင် ပို့ကုန်က ဒေါ်လာ ၅ ဒသမ ၂ ဘီလီယံနှင့်သွင်းကုန် ၅ ဒသမ ၄ဘီလီယံရှိခဲ့သည်။