စစ်ကိုင်းတိုင်း ပုလဲမြို့နယ်တွင် စစ်ကောင်စီတပ်ကို ဒေသခံပုလဲပြည်သူ့ကာကွယ်ရေးတပ်ဖွဲ့(PDF)နှင့် ပြည်သူ့တော်လှန်ရေးတပ်မတော်(PRA) တို့ ပူးပေါင်းတိုက်ခိုက်ခဲ့ရာ ၆၀ကျော်သေဆုံးပြီး ဒဏ်ရာရသူ အများအပြား ရှိခဲ့သည်ဟု PRAနှင့် ဒေသခံတို့က ပြောသည်။
ပုလဲမြို့နယ်ကို ဖြတ်သန်းလာသည့် တင့်ကားပါ စစ်ယာဉ်တန်းကို ပုလဲ PDFနှင့် PRA ပူးပေါင်းအဖွဲ့က ဝမ်းပြင်ကျေးရွာအနီး၌ မိုင်းဆွဲတိုက်ခိုက်ခဲ့ကြောင်း ဒေသခံက ပြောသည်။ ထို့ပြင် ပုလဲမြို့နယ်သို့ တပ်ကူလာသည့် မကွေးတိုင်း ဂန့်ဂေါမြို့နယ် ကျောမြို့မှ စစ်ကောင်စီယာဉ်တန်းကိုလည်း မိုင်းဆွဲတိုက်ခိုက်ခဲ့ကြောင်း ၎င်း ကဆိုသည်။
“ ပုလဲကနေ ဂန့်ဂေါလမ်းရှိတယ်။ မုံရွာ- ပုလဲ- ဂန့်ဂေါပေါ့။ အဲဒီ ကျောကတော့ ဂန့်ဂေါမြို့နယ်ထဲမှာ ပါတဲ့ စခန်းစိုက်တဲ့ နေရာပေါ့။ ကျောမြို့နယ်ခွဲအဖြစ်လည်း သတ်မှတ်ခဲ့ဖူးတယ်။ ပုလဲနဲ့ ကျောနဲ့က တစ်ဆက်တစ်စပ်တည်းပေါ့။ ပုလဲကနေ လာရင် ပုံတောင် – ပုံညာကို ကျော်ပြီးမှ ကျောကို ရောက်တာ။ လမ်းကြောင်းတွေက တစ်ဆက်တစ်စပ်တည်း”ဟု ဒေသခံ တစ်ဦးက လတ်တလော တိုက်ပွဲဖြစ်နေသည့် စစ်ကိုင်းနှင့် မကွေးအစပ်ဒေသ အခြေအနေကို ပြောပြသည်။
တိုက်ပွဲဖြစ်စဉ်နှင့်ပတ်သက်၍ PRAက သတင်းထုတ်ပြန်ရာ အောက်တိုဘာ ၃ရက် နံနက်ပိုင်းက တိုက်ပွဲ ၂ကြိမ်ဖြစ်ပွားခဲ့ပြီး စစ်ကောင်စီတပ်က ၆၁ဦးသေဆုံးသည်ဟု ဖော်ပြသည်။
Public Service Announcement
ပုလဲမြို့နယ် နဂါးမတောင် တိုက်ပွဲ၌ စစ်ကောင်စီတပ်ဖွဲ့ဝင် ၃၃ဦး သေဆုံးပြီး နတ်ထိပ်(ပုံတောင်)တိုက်ပွဲ၌ စစ်ကောင်စီတပ်မှ ၂၈ဦးသေဆုံးကြောင်း၊ စစ်ကောင်စီတပ်မှ အမြောက်အများ ဒဏ်ရာရခဲ့ကြောင်း PRAက ထုတ်ပြန်သည်။ PRA ဘက်မှ ၁ ဦး ထိခိုက်ဒဏ်ရာရရှိခဲ့သည်ဟု ဆိုသည်။
အမျိုးသားညီညွတ်ရေးအစိုးရ (NUG)က ပြည်သူများ၏ ခုခံတော်လှန်စစ် စတင်ကြောင်း ကြေညာခဲ့သည့် စက်တင်ဘာ ၇ ရက်နောက်ပိုင်း ဒေသတစ်ခုတည်းတွင် တစ်ရက်တည်းအကြမ်းဖက် စစ်ကောင်စီတပ်မှ ၆၀ကျော်သေဆုံးခြင်းမှာသေဆုံးမှု
အများဆုံးဖြစ်သည်။
