သုံးခွမြို့နယ်တွင် ရပ်ကျေးအုပ်ချုပ်ရေးမှူး၂၀ကျော်ယနေ့ တစ်ပြိုင်တည်းနှုတ်ထွက်ကြောင်း ဒေသခံများက ပြောသည်။
သုံးခွမြို့နယ် ပြည်သူ့ကာကွယ်ရေးတပ်ဖွဲ့ (TYF)က အုပ်ချုပ်ရေးမှူးများ နှုတ်ထွက်ရန် အောက်တိုဘာ ၇ရက်စွဲဖြင့် ထုတ်ပြန်ပြီးနောက် အုပ်ချုပ်ရေးမှူးအများစု နှုတ်ထွက်ခဲ့ခြင်းဖြစ်သည်။
“မနေ့ကတည်းက TYF (သုံးခွမြို့နယ် ပြည်သူ့ကာ ကွယ်ရေးတပ်ဖွဲ့)က လျှပ်စစ်ရုံးနဲ့ အခွန်ရုံးကို ဖောက်ခွဲတယ်။ပြီးတော့ အုပ်ချုပ်ရေးမှူးတွေထွက်ဖို့ သတိပေးခဲ့တာ။အခု အပြိုင်အဆိုင် ထွက်နေကြပြီ”ဟု သုံးခွမြို့နေသူတစ်ဦးက ပြောသည်။
နှုတ်ထွက်ခဲ့သည့် အုပ်ချုပ်ရေးမှူးများမှာ အဇန်းတော စွန်းကျေးရွာ၊ဇွဲထော်ကျေးရွာ၊အမှတ်(၁၁)ရပ်ကွက်၊အမှတ်(၁)ရပ်ကွက်၊အမှတ်(၂)ရပ်ကွက်၊အမှတ်(၃) ရပ်ကွက် ၊အမှတ်(၄)ရပ်ကွက်၊အမှတ် (၈) ရပ်ကွက်၊ အမှတ် (၉)ရပ်ကွက် ၊အမှတ်(၁၂)ရပ်ကွက်၊တကောကျေးရွာ နှင့် ဆယ်ရွာကျေးရွာ အုပ်ချုပ်ရေးမှူးများဖြစ်သည်။
ရန်ကုန်တိုင်း တောင်ပိုင်းခရိုင်ရှိ မြို့နယ်များအနက် စစ်ကောင်စီလက်အောက်ရှိ အုပ်ချုပ်ရေးမှူးများ နှုတ်ထွက်နေကြပြီး ခရမ်းမြို့နယ်ရှိ ရပ်ကွက် ၁၃ခုနှင့် ကျေးရွာ ၁၂ ခုမှ အုပ်ချုပ်ရေးမှူးများသည် အောက်တိုဘာ ၆ ရက်က နှုတ်ထွက်စာတင်ခဲ့ကြသည်။