အကြမ်းဖက်စစ်ကောင်စီ၏ ဗဟိုဘဏ်ကဒေါ်လာဈေးကျစေရန် တရုတ်ယွမ်ငွေနှင့် ဂျပန်ယန်းငွေများကို ဘဏ်နှင့် ငွေလဲ ကောင်တာများတွင် တရားဝင်ရောင်းဝယ်ခွင့်ပြုကြောင်း အောက်တိုဘာ ၁၂ရက် ရက်စွဲဖြင့် ထုတ်ပြန်သည်။
နိုင်ငံအတွင်း အမေရိကန်ဒေါ်လာလိုအပ်ချက်ကို မြင့်မားလာမူကိုလျှော့ချရန်အတွက် ယခုလို ခွင့်ပြုလိုက်ခြင်းဖြစ်သည်ဟု ငွေကြေးလဲလှယ်ရေးလုပ်ကိုင်နေသူများကဆိုသည်။
ဦးသိန်းစိန်အစိုးရလက်ထက်ကစပြီး နိုင်ငံအတွင်း၌ အမေရိကန်ဒေါ်လာ၊ ယူရို၊ စင်ကာပူဒေါ်လာ၊ မလေးရှား ရင်းဂစ်နှင့် ထိုင်းဘတ်ငွေများသာ တရားဝင်ရောင်းချခွင့်ပြုထားခဲ့ခြင်းဖြစ်သည်။
“ဒေါ်လာလိုအပ်ချက်များနေတာကို လျှော့ချင်လို့လုပ်တယ်ထင်တယ်။ တရုတ်ယွမ်ငွေက တရားဝင်မဟုတ်လဲ မှောင်ခိုဈေးကွက်မှာက ရနေတာပဲ”ဟု စီးပွားရေးလုပ်ငန်းရှင်တစ်ဦးက ပြောသည်။
မှောင်ခိုဈေးကွက်တွင် အောက်တိုဘာ ၁၂ရက်၌ တရုတ်ငွေ ၁ ယွမ်လျှင် ကျပ် ၃၀၀ အထက်နှင့် ဂျပန်ငွေ ၁ ယန်းလျှင် မြန်မာကျပ်ငွေ ၁၇ကျပ်ကျော်ရှိနေသည်။ စစ်တပ်အာဏာမသိမ်းခင်က ဇန်နဝါရီတတိယပတ်တွင် ၁ ယွမ်လျှင် ၂၀၀ကျပ်ဝန်းကျင်နှင့် ဂျပန်ငွေ တစ်ယမ်းလျှင် ၁၂ ကျပ်သာရှိခဲ့သည်။
Public Service Announcement
စက်တင်ဘာ တတိယပတ်ကစပြီး အမေရိကန် တစ်ဒေါ်လာကို ကျပ် ၂၈၀၀ အထိ စံချိန်တင်မြင့် တက်လာပြီးနောက် အကြမ်း ဖက်စစ်ကောင်စီက နိုင်ငံအတွင်းရှိ ဒေါ်လာအရောင်းအဝယ်များကို စတင်တင်းကြပ်ခဲ့သည်။ ပို့ကုန်ုလုပ်ငန်းရှင်များက ပို့ကုန်ရငွေ အမေရိကန်ဒေါ်လာများကို ရက်ပေါင်း ၃၀အတွင်း အတင်းအဓမ္မရောင်းချစေခြင်း၊ ပို့ကုန်ရငွေများပြည်တွင်းသို့မယူဆောင်လာသည့် လုပ်ငန်းရှင်များကို တရားစွဲခြင်း၊ ငွေလဲကောင်များတွင် ဒေါ်လာဈေးကို အတင်းကြပ် လျော့ဈေးဖြင့် သတ်မှတ်စေပြီး ငွေလဲကောင်တာများတွင် ဒေါ်လာအရောင်းများကို ပိတ်ထားခြင်း၊ပြည်သူများ၏ နိုင်ငံခြားငွေကိုင်ဆောင်ခြင်းကိုကန့်သတ်ခြင်းစသဖြင့် ပြုလုပ်ခဲ့သည်။
ထိုအပြင် ငွေလဲလုပ်ငန်းဆောင်ရွက်သူများကို ဖမ်းဆီးခြင်းနှင့် ဒေါ်လာနှင့်ပတ်သတ်ပြီး စစ်ကောင်စီက ထုတ်ပြန်သည့် အမိန့်၊ညွန့်ကြားချက်များကို မလိုက်နာသူများအား ဖမ်းဆီးရန် ဥပဒေပြင်ခြင်းတို့ပြုလုပ်ခဲ့သည်။
