-နိုင်ငံရေးနဲ့မပတ်သက်သူကိုယ်စားလှယ်ကို ဖိတ်ကြားသွားမယ်လို့ဆို
လာမယ့် အာဆီယံထိပ်သီးညီလာခံမှာ စစ်ကောင်စီခေါင်းဆောင် မင်းအောင်လှိုင်ကို တက်ရောက်ခွင့်ပြုမှာမဟုတ်ဘဲ Non-political Representative (နိုင်ငံရေးနဲ့မပတ်သက်သူကိုယ်စားလှယ်) ကို ဖိတ်ကြားသွားမယ်လို့ အာဆီယံနိုင်ငံခြားရေးဝန်ကြီးတွေက ဆုံးဖြတ်ပါတယ်။
အာဆီယံနိုင်ငံခြားရေးဝန်ကြီးတွေရဲ့ အရေးပေါ်အစည်း အဝေးကို မနေ့ကကျင်းပခဲ့ပြီး အဲဒီ အစည်းအဝေးနဲ့ပတ်သက်လို့ အလှည့်ကျဥက္ကဌ ဘရူနိုင်းက ထုတ်ပြန်ကြေညာရာမှာ ဖော်ပြထား တာဖြစ်ပါတယ်။
ဒါပေမဲ့ အာဆီယံဟာ အဖွဲ့ဝင်နိုင်ငံရဲ့ပြည်တွင်းရေး မစွက်ဖက်ရေးမူဝါဒကို ထပ်လောင်းအတည်ပြုခဲ့ပြီး မြန်မာနိုင်ငံပြည်တွင်းရေး ပုံမှန်အခြေအနေပြန်လည်ရရှိဖို့ အချိန်ပေးရမယ်လို့ ဆိုပါတယ်။
Public Service Announcement
လာမယ့် အာဆီယံထိပ်သီးညီလာခံနဲ့ ဆက်စပ်အစည်းအဝေးတွေမှာ NUG ကိုယ်စားလှယ်ကို တက်ရောက်ခွင့်ပေးဖို့ တောင်းဆိုချက်တွေကို အဖွဲ့ဝင်နိုင်ငံအချို့က လက်ခံရရှိထားပြီး အဲဒီအချက်ကို အာဆီယံနိုင်ငံခြားရေးဝန်ကြီးတွေက မှတ်သားထားတယ်လို့ဆိုပါတယ်။
ကျယ်ပြန့်တဲ့ဆွေးနွေးမှုတွေအပြီးမှာ (၃၈) ကြိမ်နဲ့ (၃၉) ကြိမ်မြောက် အာဆီယံထိပ်သီးညီလာခံနဲ့ ဆက်စပ်အစည်း အဝေးတွေကို တက်ရောက်ဖို့ မြန်မာနိုင်ငံက နိုင်ငံရေးကိုယ်စားပြုသူ(political representative)အတွက် ဘုံသဘောတူညီချက်မရရှိခဲ့ဘူးလို့ ထုတ်ပြန်ချက်မှာ ဖော်ပြပါတယ်။
ဒါ့အပြင် မြန်မာစစ်ကောင်စီဟာ ဧပြီမှာ အာဆီယံခေါင်းဆောင်တွေ ချမှတ်ခဲ့တဲ့ ဘုံဆုံးဖြတ်ချက် ၅ ရပ်ကို အကောင်အထည်ဖော်ရာမှာ သိသာတဲ့တိုးတက်မှုမရှိခဲ့ဘူးလို့ အာဆီယံနိုင်ငံခြားရေးဝန်ကြီးတွေက သတ်မှတ်ပါတယ်။
