စမ်းချောင်းမြို့နယ်အတွင်း အကြမ်းဖက်စစ်ကောင်စီ၏ တပ်ဖွဲ့ဝင်များကို တိုက်ပေါ်မှ ရေနွေးပူဖြင့်လောင်းချမှုကြောင့် ဖမ်းဆီးခံထားရသည့် အမျိုးသမီးငါးဦးမှာ ယနေ့(အောက်တိုဘာ၁၉) လွတ်မည့်စာရင်းတွင်ပါဝင်ကြောင်း ၎င်းတို့၏ ကိုယ်စားလှယ်ရှေ့နေ ဦးသက်နောင်က People’s Spring အတည်ပြုပြောသည်။
မအိအိအောင်၊မခင်နှင်းဦး၊ မယုယုဝင်း၊မဒေလီယာမောင် နှင့် မစန္ဒာစိုးတို့သည် စစ်ကောင်စီ၏တပ်ဖွဲ့များ လမ်းအတွင်းဝင်ရောက်လာစဥ် တိုက်ခန်းပေါ်မှ ရေနွေးပူဖြင့် လောင်းကာ အာဏာရှင်ကို ရရာနည်းဖြင့် ဆန့်ကျင်ခဲ့ကြသူများဖြစ်သည်။
မတ်လ ၂ ရက်က ထိုဖြစ်စဥ်တွင် စစ်ကောင်စီတပ်ဖွဲ့က ၎င်းတို့ နေထိုင်ရာ တိုက်ခန်းကို ချိုးဖျက် ဖမ်းဆီးသွားခဲ့သည်။
“စုစုပေါင်းဆို ရှစ်လ နီးပါးကြာခဲ့တာပေါ့။သူတို့မိဘတွေကလည်းနယ်ကဆိုတော့ အရမ်းခက်ခဲတယ်။လွတ်လာတဲ့စာရင်းထဲပါလာတော့ အရမ်းဝမ်းသာမိတယ်”ဟု တရားလွတ်တော်ရှေ့နေ ဦးသက်နောင်က ပြောသည်။
Public Service Announcement
မအိအိအောင်၊မခင်နှင်းဦး၊ မယုယုဝင်း၊မဒေလီယာမောင် နှင့် မစန္ဒာစိုးတို့သည် အင်းစိန်ထောင်၏ အမျိုးသမီးအချုပ်ဆောင် (၃)တွင်နေထိုင်ခဲ့ရပြီး ယခုရက်ပိုင်းအတွင်း ဖျားနာမှုများ ရှိခဲ့သည်ဟု ၎င်းက ဆိုသည်။
အကြမ်းဖက်စစ်ကောင်စီသည် ၎င်းတို့ မတရားဖမ်းဆီးပြီး ပုဒ်မအမျိုးမျိုးတပ်ကာ ပြစ်ဒဏ်ချမှတ်ထားသည့် ပြည်သူများအနက် ၁,၃၀၀ ကျော်ကိုပြန်လွှတ်ပေးခဲ့ပြီး တရားစွဲဆိုထားသည့် ပြည်သူ ၄,၃၀၀ ကျော်ကို အမှုပိတ်သိမ်းပေးခဲ့ကြောင်း အောက်တိုဘာ ၁၈ ရက်ကထုတ်ပြန်ထားသည်။
