ကုလသမဂ္ဂဆိုင်ရာမြန်မာသံအမတ်ကြီး ဦးကျော်မိုးထွန်းဟာ အပြည်ပြည်ဆိုင်ရာရီပက်ဗလစ်ကန်အင်စတီကျု(IRI)က ပေးအပ်ချီးမြှင့်တဲ့ ၂၀၂၁ ခုနှစ် လွတ်လပ် ခွင့်ဆု(John McCain Freedom Award)ကို မနေ့က ကိုယ်တိုင်လက်ခံရယူခဲ့ပါတယ်။
ဒီမိုကရေစီသူရဲကောင်းတွေအဖြစ် ရွေးချယ်ချီးမြှင့်တဲ့ အဲဒီ ဆုပေးပွဲအခမ်းအနားကို အမေရိကန်ပြည်ထောင်စု၊ ဝါရှင်တန်မြို့တော်မှာ မနေ့ (အောက်တိုဘာ ၁၉ )က ပြုလုပ်ကျင်းပခဲ့တာပါ။
အဲဒီဆုဟာ ဖိနှိပ်၊အကြမ်းဖက်မှုတွေကြားက စစ်အာဏာ ရှင်ကို ရဲရဲဝံ့ဝံ့တွန်းလှန်နေတဲ့ မြန်မာပြည်သူတွေအတွက် ဖြစ်တယ်လို့ သံအမတ်ကြီးဦးကျော်မိုးထွန်းက ပြောဆိုထားပါတယ်။
ကမ္ဘာတဝန်းဒီမိုကရေစီမြှင့်တင်ရေးအဖွဲ့ IRI ဟာ လစ်ယူယေးနီးယားဝန်ကြီးချုပ်၊ မြန်မာသံအမတ်ကြီးဦးကျော်မိုးထွန်း၊ ဘီလာရုစ်နိုင်ငံရေးအကျဉ်းသားများအရေး ညှိနှိုင်းရေးကောင်စီကိုယ်စားလှယ်နဲ့ ဂရမ်မီဆုရှင်ကျူးဘားအနုပညာရှင်တို့ကို ၂၀၂၁ ခုနှစ် ဒီမိုကရေစီသူရဲကောင်းတွေအဖြစ် ရွေးချယ်သတ်မှတ်ခဲ့ပြီး John McCain Freedom Award ကို ပေးအပ်ချီးမြှင့်တာဖြစ်ပါတယ်။
အဲဒီ John McCain Freedom Award ကို ၁၉၉၉ ခုနှစ်က နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ရရှိခဲ့ဖူးပါတယ်။