ခုခံကာကွယ်စစ်နှင့် တော်လှန်ရေးအရှိန် မြှင့်တင်တော့မည်ဖြစ်သောကြောင့် စစ်ကိုင်းတိုင်း မုံရွာ – မန္တလေး ကားလမ်းမကြီးပေါ်သို့ အရေးကြီး ကျန်းမာရေးကိစ္စရပ်များမှလွဲ၍တက်နိုင်သမျှ အသုံးမပြုရန် မုံရွာအခြေစိုက်ပြည်သူ့ကာကွယ်ရေးအဖွဲ့များက အသိပေးသည်။
မုံရွာနယ်အခြေစိုက် ဒေသတွင်းပြည်သူ့ကာကွယ်ရေးအဖွဲ့များဖြစ်သည့် PDF_South_Monywa၊ Monywa_Heroes_Group၊ သံမဏိအဖွဲ့သားများက ပြည်သူများကို မုံရွာ – မန္တလေး လမ်းမကြီးအား တတ်နိုင်သမျှ အသုံးမပြုကြပါရန် အနူးအညွတ် မေတ္တာရပ်ခံတောင်းပန်ကြောင်း၊မုံရွာ – မန္တလေး လမ်းမကြီးအား အသုံးပြုမည်ဆိုပါက မိမိတို့၏ မော်တော်ယာဉ်များကို စစ်ကားတန်းများနှင့် တတ်နိုင်သမျှ ဝေးရာနေရာမှ မောင်းနှင်ပေးကြစေလိုကြောင်း အသိပေးသည်။
ပြည်သူ့ကာကွယ်ရေး ရဲဘော်များသည် မိဘပြည်သူများအား ထိခိုက်မည့် မည်သည့်ကိစ္စရပ်မျှ ပြုလုပ်မည်မဟုတ်သည်ကို အကြမ်းဖက်စစ်ကောင်စီမှ သိရှိပြီး ၎င်းတို့က ထိုအချက်ကို လက်နက်သဖွယ် အသုံးပြုနေကြသည်ကို မိဘပြည်သူများ နားလည်သဘောပေါက်ကြမည်ဖြစ်ကြောင်း၊ မုံရွာ-မန္တလေးလမ်းမကြီးတွင်အရေး ကြီး ကျန်းမာရေးကိစ္စရပ်များမှလွဲ၍ တက်နိုင်သမျှ အသုံးမပြုရန်နှင့် ညအချိန် (ည၇ နာရီနောက်ပိုင်း) ခရီးသွားလာခြင်းများ မပြုလုပ်ခြင်းဖြင့် တော်လှန်ရေးတိုက်ပွဲမှာပူးပေါင်းပါဝင်ပေးကြစေလိုကြောင်း ပြည်သူ့ကာကွယ်ရေးအဖွဲ့များက အသိပေးကြေညာထားသည်။
ယနေ့(အောက်တိုဘာ၂၇) နံနက်ပိုင်းကလည်း မုံရွာ- မန္တလေးလမ်းမကြီးပေါ် မြင်းမူနှင့် စစ်ကိုင်းနယ်များတွင် စစ်ကောင်စီတပ်ကားများ မိုင်းဆွဲတိုက်ခိုက်ခြင်းခံခဲ့ရကြောင်း ဒေသခံများက ပြောသည်။
Public Service Announcement
