အကြမ်းဖက်စစ်ကောင်စီတပ်မှ ထန်တလန်မြို့ရှိ ပြည်သူအိုးအိမ်များ မီးရှို့ဖျက်ဆီးမှုအပေါ် အလွန်ပင်စိတ်မကောင်းဖြစ်ရပြီး အကြမ်းဖက်စစ်ကောင်စီကျဆုံးထိတိုင်အောင်တိုက်ထုတ်သွားမည်ဟု ပြည်သူ့ကာကွယ်ရေးတပ်-ဒီးမော့ဆို (DMO-PDF)က ယနေ့(အောက်တိုဘာ ၃၀)ညပိုင်းတွင် ထုတ်ပြန်သည်။
“လက်နက် ကိုင်ချင်း ပစ်ခတ်လို့ ထိခိုက်နစ်နာတာမျိုးဆို ဖြေသာတယ်။ဘာမှ မဆိုင်တဲ့ ပြည်သူလူထုရဲ့ အိုးအိမ်စည်းစိမ်ကိုဖျက်ဆီးတာကျ တော့ ဘယ်လိုမှ မဖြေနိုင်ဘူး။လူမဆန်တဲ့လုပ်ရပ်တွေအတွက် ကျွန်တော်တို့ အဆုံးထိ တိုက်မယ်”ဟု ပြည်သူ့ကာကွယ်ရေးတပ်-ဒီးမော့ဆိုမှ တာဝန်ရှိသူက ပြောသည်။
ချင်းပြည်နယ် ထန်တလန်မြို့အား အာဏာသိမ်းစစ်ကောင်စီက လက်နက်ကြီးများဖြင့် ပစ်ခတ်ခဲ့သည့် အပြင် ဘုရားကျောင်းနှစ်ကျောင်း နှင့် ပြည်သူ့အိုးအိမ် အနည်းဆုံး ၁၆၃ လုံးကို မီးရှို့ဖျက်ဆီးခဲ့သည်။
ထို့ကြောင့် ပြည်သူ့ကာကွယ်ရေးတပ်-ဒီးမော့ဆိုမှ ထန်တလန်မြို့ရှိ ပြည်သူများနှင့်အတူ ချင်းပြည်နယ်မှ ညီနောင်တိုင်းရင်းသားများနှင့်ထပ်တူ အထူးကြေကွဲရသည်ဟု ထုတ်ပြန်ချက်၌ ဖော်ပြသည်။
ထို့အပြင် အကြမ်းဖက် စစ်ကောင်စီ၏ ယခုကဲ့သို့ ပြည်သူ့အိုးအိမ်များဖျက်စီးသည့် လုပ်ရပ်အပေါ် ပြင်းထန်စွာကန့်ကွက်ရှုံ့ချကြောင်း (DMO-PDF)က အသိပေးသည်။
အကြမ်းဖက်စစ်အာဏာရှင် ကျဆုံးစေရေးအတွက် (DMO-PDF)သည် ထန်တလန် CDF နှင့်အတူ ရပ်တည်သွားမည်ဖြစ်ပြီး ထန်တန် ပြည်သူများအတွက် တစ်နိုင်ငံလုံးမှပြည်သူများမှ ဝိုင်းဝန်ကူညီပေးကြရန်လည်း တိုက်တွန်းထားသည်။
ဒီမော့ဆိုးPDFသည် ဒီမော့ဆိုးမြို့နယ်တွင် စစ်ကောင်စီတပ်ကို ခုခံတိုက်ခိုက်ပြီး ဒေသခံပြည်သူများကို ကာကွယ်ပေးနေသောအဖွဲ့ဖြစ်သည်။
ဓာတ်ပုံ – ထန်တလန် CDF