အမေရိကန်နိုင်ငံခြားရေးဝန်ကြီးနဲ့ တရုတ်နိုင်ငံခြားရေးဝန်ကြီးတို့တွေ့ဆုံဆွေးနွေးရာမှာ မြန်မာ့ အရေးကိုလည်း ထည့်သွင်းဆွေးနွေးခဲ့တယ်လို့ အမေရိကန်နိုင်ငံခြားရေးဝန်ကြီးဌာနက ထုတ်ပြန်ပါတယ်။
အောက်တိုဘာ ၃၁ ရက်က G-20 ညီလာခံကျင်းပနေတဲ့ အီတလီ၊ ရောမမြို့မှာ ကမ္ဘာ့အင်အားကြီးနှစ်နိုင်ငံရဲ့ နိုင်ငံခြားရေးဝန်ကြီးတွေ မျက်နှာချင်းဆိုင်တွေ့ဆုံခဲ့ကြတာဖြစ်ပြီး မြောက်ကိုရီးယား၊ မြန်မာ၊ အီရန်၊ အာဖဂန်နစ္စတန်နဲ့ ရာသီဥတုအကျပ်အတည်းအပါအဝင် အမေရိကန်-တရုတ် နှစ်နိုင်ငံအကျိုးစီးပွား ကန့်သတ်ချက်တွေနဲ့ အတူလုပ်ဆောင်နိုင်မယ့် နယ်ပယ်တွေကို ဆွေးနွေးခဲ့ကြတယ်လို့ ဆိုပါတယ်။
မြန်မာ့အရေးနဲ့ပတ်သက်လို့ အမေရိကန်-တရုတ် နှစ်နိုင်ငံစလုံးက အာဆီယံအဖွဲ့ကို ဗဟိုပြုထား ပြီး အာဆီယံခေါင်းဆောင်တွေချမှတ်ခဲ့တဲ့ ဘုံဆုံးဖြတ်ချက် ၅ ရပ်ကိုအမြန်ဆုံးအကောင်အထည် ဖို့တိုက်တွန်းထားတာဖြစ်ပါတယ်။
ပြီးခဲ့တဲ့ အာဆီယံထိပ်သီးညီလာခံမှာ အကြမ်းဖက်စစ်ကောင်စီခေါင်းဆောင် မင်းအောင်လှိုင်ကို အစည်းအဝေးမတက်ရောက်စေဖို့ဆုံးဖြတ်ချက်ကို အမေရိကန်က ကြိုဆိုထောက်ခံကြောင်း ပြောကြားခဲ့ပြီး မြန်မာနိုင်ငံမှာ ဒီမိုကရေစီစနစ်ကိုအမြန်ဆုံးပြန်လှည့်ဖို့ တိုက်တွန်းခဲ့ပါတယ်။
Public Service Announcement
တရုတ်က အာဆီယံရဲ့ဆုံးဖြတ်ချက်နဲ့ပတ်သက်လို့ တစုံတရာထုတ်ဖော်ပြောကြားခြင်းမရှိပေမယ့် မင်းအောင် လှိုင်ကို တက်ရောက်ခွင့်မပေးခဲ့တဲ့အပေါ် နှုတ်ဆိတ်နေတာဟာ သဘောတူထောက်ခံတဲ့သဘောသက်ရောက်တယ်လို့ နိုင်ငံရေးလေ့လာသုံးသပ်သူတွေက ဆိုကြပါတယ်။
