စစ်တပ်အာဏာသိမ်းမှုကြောင့် နှုတ်ထွက်သွားသည့် နိုင်ငံခြားရင်းနှီးမြှပ်နှံမှု ၂,၀၀၀နီးပါးရှိနေ

စစ်တပ်အာဏာသိမ်းမှုကြောင့် မြန်မာနိုင်ငံက နှုတ်ထွက်သွားသည့် နိုင်ငံခြားရင်းနှီးမြှပ်နှံမှု ၁,၈၇၃ ခုရှိသည်ဟု အကြမ်းဖက်စစ်ကောင်စီထိန်းချုပ်ထားသည့် ရင်းနှီးမြှပ်နှံမှုနှင့်ကုမ္ပဏီများညွန့်ကြားမှုဦးစီးဌာန၏ စာရင်းများအရ သိရသည်။

ဦးသိန်းစိန်အစိုးရလက်ထက်ကတည်း လစဉ်ဖော်ပြနေသည့် ရင်းနှီးမြှပ်နှံမှုဆိုင်ရာစာရင်းများကို အကြမ်းဖက်စစ်ကောင်စီက ၂၀၂၁ စက်တင်ဘာနောက်ပိုင်းက စတင်ပြီးဖော်ပြခြင်းမရှိတော့ပေ။

ထိုပြင် မြန်မာမှ နှုတ်ထွက်သွားရန် စီစဉ်နေသည့် ကုမ္ပဏီများစွာရှိပြီး ၎င်းတို့ထဲတွင် နာမည်ကျော် ကုမ္ပဏီများပါဝင်ကာ ဂျာမဏီကုမ္ပဏီ METRO၊ အိန္ဒိယကုမ္ပဏီ ADANI နှင့် Telenorကုမ္ပဏီတို့လည်း ပါဝင်သည်။

အကြမ်းဖက်စစ်တပ်က နိုင်ငံတော်အာဏာကို အဓမ္မလုယူပြီးနောက် နိုင်ငံတွင်းရင်းနှီးမြှပ်နှံမှုလုပ်ငန်းများ လျော့ကျလာခဲ့သည်။ အကြမ်းဖက်စစ်ကောင်စီက ၂၀၂၀-၂၁ ဘဏ္ဍာနှစ်တွင် နိုင်ငံခြားရင်းနှီးမြှပ်နှံမှု ဒေါ်လာ ၃ ဒသမ ၈ ဘီလီယံခန့်ဝင်ရောက်ခဲ့သည်ဟု ထုတ်ပြန်ထားသည်။ သို့သော်လည်း ထိုစာရင်းများသည် လိမ်ညာထားခြင်းဖြစ်ပြီး ဖေဖော်ဝါရီ ၁ ရက် စစ်တပ်က အာဏာကို လုယူပြီးနောက် မည့်သည့် ရင်းနှီးမြှပ်နှံမှုများဝင်ရောက်ခြင်းမရှိဟု စီးပွားရေးလုပ်ငန်းရှင်တစ်ဦးကပြောသည်။

Public Service Announcement

အကြမ်းဖပ်စစ်ကောင်စီက ထုတ်ပြန်ထားသောစာရင်းပင်လျှင် ၈နှစ်အတွင်း နိုင်ငံခြားရင်းနှီးမြှပ်နှံမှုမှာ ဝင်ရောက်မှုအနည်းဆုံးဖြစ်သည်။

၂၀၁၉-၂၀ ဘဏ္ဍာနှစ်တွင် နိုင်ငံခြားရင်းနှီးမြှပ်နှံမှု ဒေါ်လာ ၅ ဒသမ ၅ ဘီလီယံကျော်ဝင်ရောက်ခဲ့သည်။

အရပ်သားအစိုးရလက်ထက် ၂၀၂၀ အောက်တိုဘာ ၁ ရက်မှ ၂၀၂၁ဇန်နဝါရီ ၃၁ ရက်အထိ လေးလအတွင်း နိုင်ငံခြားရင်းနှီးမြှပ်နှံမှု သန်း ၆၀၀ကျော် ဝင်ရောက်ခဲ့သည်။

စစ်တပ်အာဏာသိမ်းမှုကြောင့် နိုင်ငံစီးပွားရေးကျဆင်းနေပြီး ၂၀၂၁ခုနှစ်တွင် စီးပွားရေးကျဆင်းမူသည် ၁၈ ဒသမ ၄ ရာခိုင်နှုန်းရှိမည့်ဟု အာရှဖွံဖြိုးရေးဘဏ် (ADB)ကဆိုထားသည်။ စစ်တပ်အာဏာသိမ်းထားမှုကြောင့် လာမည့် ၂၀၂၂တွင်လည်း စီးပွားရေးဆက်လက်ကျဆင်းမည်ဟု အပြည်ပြည်ဆိုင်ရာငွေကြေးရန်ပုံငွေအဖွဲ့က ဆိုထားသည်။