မတရားဖမ်းဆီးခံထားရတဲ့သတင်းသမားအားလုံးကို ပြန်လွှတ်ပေးဖို့နဲ့ သတင်းသမားတွေဟာ ခြိမ်းခြောက်ခံရခြင်း ဒါမှမဟုတ် ဖမ်းဆီးခြင်းခံရမှာကို စိုးရိမ်ကြောက် လန့်မှုမရှိဘဲ လုပ်ဆောင်ခွင့်ပြုဖို့ ဗြိတိန်အစိုးရက တောင်းဆိုလိုက်ပါတယ်။
လွန်ခဲ့တဲ့ ၉လ မြန်မာနိုင်ငံမှာ စစ်အာဏာသိမ်းခဲ့တဲ့အချိန်ကစပြီး စစ်အာဏာရှင်ဟာ သတင်းသမား ၁၀၀ကျော်ကို ဖမ်းဆီးခဲ့ပြီး အနည်းဆုံးအယောက် ၃၀ခန့် ထိန်းသိမ်းခံထားရဆဲဖြစ်သည့်အပြင် အမှီအခိုကင်းတဲ့ မီဒီယာအားလုံးနီးပါးကို ပိတ်ပစ်ဖို့ကြိုးပမ်းခဲ့တယ်လို့ မြန်မာ နိုင်ငံဆိုင်ရာ ဗြိတိန်သံရုံးက ဒီနေ့ ထုတ်ပြန်ပါတယ်။
“မြန်မာနိုင်ငံတွင် သတင်းမီဒီယာလွတ်လပ်ခွင့်မရှိလျှင် ဒီမိုကရေစီနှင့် အဓိပ္ပါယ်ရှိသော ရွေးကောက်ပွဲမရှိနိုင်ပါ” လို့ ဗြိတိန်သံရုံးက ဆိုပါတယ်။
မြန်မာသတင်းသမားတွေဟာ သူတို့အလုပ်ကို ရိုးရှင်းစွာထမ်းဆောင်ရုံမျှဖြင့် တရားစွဲဆိုခြင်း၊ ထောင်ချခြင်းနဲ့ ညှင်းပန်းနှိပ်စက်ခြင်း အန္တရာယ်တွေနဲ့ ကြုံတွေ့နေရတယ်လို့ သံရုံးရဲ့ထုတ်ပြန်ချက်မှာဖော်ပြပါတယ်။