ကျပ်သိန်း ၂၀၀ ထက်ပိုသော အရောင်း၊အဝယ်နှင့် ဝန်ဆောင်မှုလုပ်ငန်းမှန်သမျှ ဘဏ်စနစ်ဖြင့်သာ ငွေပေး၊ငွေချေပြုလုပ်ရမည်ဟု အာဏာသိမ်းစစ်ကောင်စီ၏ လက်အောက်ခံ ဗဟိုဘဏ်က ယနေ့(နိုဝင်ဘာ ၃)အမိန့်ကြော်ငြာစာထုတ်ပြန်သည်။
ငွေပေးချေမှုစနစ် ပိုမိုထိရောက်စွာ အကောင် အထည်ဖော်ရန် အခြေပစ္စည်း(အိမ်၊ခြံ၊မြေ)နှင့် ကုန်ပစ္စည်းရောင်းခြင်း၊ဝယ်ခြင်း၊လွှဲပြောင်းခြင်းများအတွက် ငွေပေးချေမှုကို ကျပ်သိန်း ၂၀၀ထက် မပိုစေရဟု စစ်ကောင်စီလက်အောက်ခံ ဗဟိုဘဏ်က ဆိုသည်။
“ဘဏ်တွေမှာပါ သူတို့က ထိန်းချုပ်ပြီးသားဖြစ်နေတဲ့အတွက် ထပ်ဆင့်ထက်ပြီး ထိန်းချုပ်တဲ့သဘောဖြစ်နေတယ်။Digital Money သိပ်မဖွံ့ဖြိုးသေးတဲ့ နိုင်ငံမှာ ဒီလိုလုပ်တယ်ဆိုတာ အကျိုးသက်ရောက်မှု တော်တော်ကြီးနိုင်တယ်။အဓိကတော့ ပမာဏ ရာနဲ့ချီတဲ့ ငွေကြေးစီးဆင်းမှုတွေကို စောင့်ကြည့်မယ်ဆိုတဲ့ သဘောပဲ”ဟု စီးပွားရးလုပ်ငန်းရှင်တစ်ဦးက ပြောသည်။
ကျပ်သိန်း ၂၀၀ထက် ပိုသည့် ငွေပေးချေမှုများကို ဘဏ်စနစ်အသုံးပြု၍ ဒီဂျစ်တယ် ငွေပေးချေမှုနည်းလမ်းများဖြစ်သော မိုဘိုင်ဘဏ်လုပ်ငန်း၊အင်တာနက်ဘဏ်လုပ်ငန်း၊ဘဏ်ကဒ်များဖြင့် ငွေပေးချေခြင်း၊ချက်လက်မှတ် အိမ့်လွှာဖြင့် ပေးချေခြင်း၊စာရင်းပြောင်းပေးခြင်းနှင့် ငွေသားဖြင့် ဘဏ်သို့ ငွေသွင်းပြီးကြောင်းစာရွက်စာတမ်းအထောက်အထားများ ပြရမည်ဖြစ်သည်။
ယခု အမိန့်ညွှန်ကြားချက်ကို လိုက်နာမှုပျက် ကွက်ပါက တည်ဆဲဥပဒေတစ်ရပ်ရပ်ဖြင့် အရေးယူမည်ဟု စစ်ကောင်စီ ဗဟိုဘဏ်က သတိပေးသည်။