ကန်ပက်လက်တွင် စစ်ကောင်စီတပ်က ဖမ်းဆီးထားသူ သုံးဦး လက်နက်နှစ်လက်လုယူပြီးထွက်ပြေး လွတ်မြောက်

ချင်းပြည်နယ် ကန်ပက်လက်တွင် စစ်ကောင်စီတပ်က ဖမ်းဆီးသွားသည့် လူငယ်အချို့သည် စစ်ကောင်စီတပ် ၏ လက်နက်အချို့ကို လုယူပြီး ထွက်ပြေးလွတ်မြောက်သွားကြောင်း ချင်းဒေသခံနှင့် ချင်းလက်နက်ကိုင်အဖွဲ့ တာဝန်ရှိသူအချို့က ပြောသည်။

ယခင်နေ့များက ဖမ်ဆီးထားသည့် ကန်ပက်လက်ဒေသခံ နှစ်ဦးနှင့် ဆောဒေသခံတစ်ဦးကို ကန်ပက်လက် ရဲစခန်း၌ ချုပ်ထားပြီးနောက် ယနေ့(နိုဝင်ဘာ ၁၇ရက်) နံနက်တွင် အင်အား ၅၀ ခန့်ရှိသော စစ်ကောင်စီတပ်၏ စစ်ကြောင်းတွင် လမ်းပြဆိုကာ လူသားဒိုင်းအဖြစ် အသုံးပြုခေါ်ဆောင်စဉ် ထွက်ပြေးလွတ်မြောက်လာခြင်း ဖြစ်သည်ဟုဆိုသည်။

“သူတို့ သုံးယောက်စလုံးကို မနက်ပိုင်းက ဆောဘက်ကို လူသားဒိုင်းသဘောမျိုးနဲ့ သွားခိုင်းတာ။ လမ်းမှာ ခဏနားနေတဲ့အချိန်မှာ သူတို့ သေနတ်နှစ်လက်ယူပြီး သုံးယောက်စလုံးထွက်ပြေးသွားတာ”ဟု ချင်းဒေသခံတစ်ဦးက ပြောသည်။

ချင်းအမျိုးသားတပ်ဦး(CNF) ပြောရေးဆိုခွင့်ရှိသူ ဆလိုင်းထက်နီကကလည်း “သူကတေ့ာ လုံခြုံတဲ့နေရာတော့ ရောက်ရှိပြီ” ဟု ပြောသည်။ ထွက်ပြေးလာသူ လူငယ်အချို့သည် စစ်ကောင်စီတပ်၏ လက်နက်အချို့ကို ယူဆောင်လာသည်ဟုလည်း ၎င်းက ဆိုသည်။

Public Service Announcement

The Chin Journal ကလည်း ချင်းပြည်နယ် ကန်ပက်လက်မြို့နယ်တွင် စစ်ကောင်စီတပ်၏ ဖမ်းဆီးထိန်းသိမ်းခြင်း ခံရသည့် CDF ကန်ပက်လက် ရဲဘော် နှစ်ဦးနှင့် Yaw PDF ရဲဘော်တစ်ဦးတို့အား ယနေ့နံနက်ပိုင်းတွင် စစ်ကောင်စီ တပ် သားများက ဆောဖက်သို့ လူသားဒိုင်းအဖြစ် ခေါ်ဆောင်ခဲ့ရာ နံနက် ၄နာရီခန့်တွင် စစ်ကောင်စီတပ်သားများ၏ သေနတ်နှစ်လက်ကို လုယူပြီး သုံးဦးစလုံး အောင်မြင်စွာ ထွက်ပြေးလွတ်မြောက်နိုင်ခဲ့သည်ဟု ဖော်ပြသည်။