ရန်ကုန်တိုင်းအတွင်းရှိ မြို့နယ် ၂၉ ခုမှ ပြည်သူ့ကာကွယ်ရေးတပ်ဖွဲ့ဝင် ၄၃ ဦးနှင့် ထောက်ပံ့ ကူညီသူ ၈ ဦးကို ဖမ်းဆီးရမိကြောင်း စစ်ကောင်စီကထုတ်ပြန်သော်လည်း ရန်ကုန်မြို့ပြပျောက်ကျားအဖွဲ့အချို့က အဖမ်းခံရသူ ၃၀ ဝန်ကျင်သာဖြစ်ကြောင်းပြောသည်။
ဒဂုံမြို့သစ် (အရှေ့၊ တောင်၊ မြောက်၊ ဆိပ်ကမ်း) နယ်မြေမှ ၅ ဦး၊ (တောင်ဥက္ကလာပ၊ မြောက်ဥက္ကလာပ၊ ဗဟန်း၊ သင်္ဃန်းကျွန်း၊ တာမွေ၊ မင်္ဂလာတောင်ညွန့်) မြို့နယ် မှ ၉ ဦး၊ (လှိုင်၊ လှည်းတန်း၊ စမ်းချောင်း၊ ကမာရွတ်၊ ကြည့်မြင်တိုင်)မြို့နယ်မှ ၁၄ ဦး၊ (အလုံ၊ ပုစွန်တောင်၊ လမ်းမတော်၊ ကျောက်တံတား၊ လသာ) မြို့နယ်မှ ၄ ဦး၊ (သာကေတ၊ သန်လျင်၊ ဒေါပုံ) မြို့နယ်တို့မှ ၇ ဦး၊ (တွံတေး၊ ကော့မှူး၊ ကွန်းခြံကုန်း)တို့မှ ၁ ဦး နှင့် (အင်းစိန်၊ လှိုင်သာယာ၊ ရွှေပြည်သာ၊ ထန်းတပင်)မြို့နယ်တို့မှ ၃ ဦး ဖြစ်သည်ဟုအာဏာသိမ်းစစ်ကောင်စီဝါဒဖြန့် မြဝတီနှင့်MRTVသတင်းတို့တွင်နိုဝင်ဘာ ၁၇ ရက်ညကြေညာခဲ့သည်။ ၄၃ ဦးအနက် တစ်ဦးကို အသေပစ်ခတ်ဖမ်းဆီးခဲ့ပြီး ၎င်းတို့အားကူညီထောက်ပံ့ပေးသူ ၈ ဦးကိုလည်း ဖမ်းမိသည်ဟု အကြမ်းဖက်စစ်ကောင်စီကဆိုသည်။
ဖမ်းမိခဲ့သူများသည် ဗားဂရာမီးပွိုင့်ရှိ စစ်ကောင်စီလုံခြုံရေးအဖွဲ့ဝင်ပစ်ခတ်မှု နှင့် ထန်းတပင် ပစ်ခတ်မှုများအပြင် သန်လျင်တံတား၊ မြောက်ဥက္ကလာတံတား ပစ်ခတ်မှုများတွင် ပါဝင်သူများဟု စစ်ကောင်စီမီဒီယာများကဝါဒဖြန့်သည်။
“ပါသွားတဲ့သူတွေလည်း ပါသွားတယ်။ဒါပေမယ့် သူတို့ထုတ်ပြန်ချက်ထဲပါတဲ့သူအချို့တော့မသိဘူး။ ကျွန်တော်တို့ စာရင်းပြုစုထားသလောက်ဆို ၂၀ ကျော်ပါသွားတယ်”ဟု ရန်ကုန်မြို့ပြပျောက်ကြားအဖွဲ့တာဝန်ရှိသူတစ်ဦးက ပြောသည်။
Public Service Announcement
ရန်ကုန်မြို့ပြပျောက်ကျားတပ်ဖွဲ့များနှင့်နီးစပ်သောသတင်းရပ်ကွက်က ယခုရက်ပိုင်းအတွင်းဖမ်းဆီးခံရမှုမှာ (၃၀) ဝန်းကျင်ရှိကြောင်းလည်းပြောသည်။
အမျိုးသားညီညွတ်ရေးအစိုးရ (NUG) ၏ ရန်ကုန်တိုင်းစစ်ဒေသခွဲကွပ်ကဲရေးအဖွဲ့က အဖမ်းခံရသည့် ၎င်းတို့၏ အဖွဲ့ဝင်အရေအတွက်မှာ၂၀ ခန့် ရှိသည်ဟုတာဝန်ရှိသူတစ်ဦးက ပြောကြောင်းMyanmar Now သတင်းဌာယနေ့
(နိုဝင်ဘာ ၁၈)တွင်သတင်းဖော်ပြထားသည်။ အဖမ်းခံရသူများမှာ နိုဝင်ဘာ ၁၂ မှ ၁၇ အတွင်း ပစ်ခတ်မှုများနှင့် ဆက်စပ်သူများဟု စစ်ကောင်စီက ဆိုသော်လည်း အလုံးစုံ မှန်ကန်ခြင်းမရှိဟု ရန်ကုန်တိုင်းစစ်ဒေသခွဲကွပ်ကဲရေးအဖွဲ့၏ သတင်းပြန်ကြားရေးနှင့် စိတ်ဓာတ်စစ်ဆင်ရေးတာဝန်ခံက ပြောသည်ဟု Myanmar Now တွင်ဖော်ပြထားသည်။
“အဖမ်းခံခဲ့ရတဲ့သူတွေထဲမှာ တကယ်တိုက်ပွဲဝင်ခဲ့တဲ့ ရဲဘော်ပါသလို၊ သာမန်ပြည်သူတွေကို ဖမ်းဆီးပြီး ဇာတ်လမ်းဆင်ထားတာတွေ အများကြီးပါပါတယ်” ဟု အထက်ပါပုဂ္ဂိုလ်ကMyanmar Now သတင်းဌာနကိုပြောကြားကြောင်းပါရှိသည်။
ထို့အပြင် ရန်ကုန်မြို့တွင်း မြို့ပြတိုက်ခိုက်ရေး အဖွဲ့များ၏ လှုပ်ရှားရန် နယ်မြေကျဥ်းလာပြီး ပြည်သူများ၏ ပူးပေါင်းပါဝင်မှုနှင့် NUG အစိုးရ၏ အသိအမှတ်ပြုထောက်ပံ့မှုများ ယခု ထက်ပိုလိုအပ်နေပြီဟု UG အချို့က ဆိုသည်။
“မြို့ကြီးများတွင်နေထိုင်ရေးအလွန်ခက်ခဲပါသည်။ ထောက်ပံ့မှုများကိုပင်လက်ခံဖို့မရဲဖြစ်ရသလိုအနေအစားဆင်းရဲစွာဖြင့် စစ်အာဏာရှင်၏ ဒေါက်တိုင်များကိုရှင်းလင်းရေးကိုအသက်ဖြင့်ရင်း၍လုပ်ဆောင်နေကြပါသည်။ ကျွန်တော်တို့သည်တော်လှန်ရေး၏ကျရာကဏ္ဏတွင်ဝင်ရောက်ထမ်းဆောင်နေခြင်းဖြစ်သည်။ UG များသည်စစ်သွေးကြွများမဟုတ်ပါ။ ကျွန်တော်တို့ကျရာကဏ္ဍတွင်အသက်ကိုပင်ပဓာနမထားပဲဆောင်ရွက်နေကြပါသည်။ လူကြီးမင်းတို့လည်း သတ္တိရှိရှိဖြင့် တော်လှန်ရေးရဲဘော်များဖြစ်သော UG များကိုရဲရဲဝင့်ဝင့်အသိအမှတ်ပြုစေချင်သည်”ဟုမြို့ပြပျောက်ကျားအဖွဲ့တစ်ဖွဲ့ဖြစ်သော Little Heros အဖွဲ့က ပြောသည်။
အခက်အခဲများကြားမှ စစ်အာဏာရှင်ဖြုတ်ချရေး အတွက် မြို့ပြပျောက်ကျားအဖွဲ့များက ခုခံတော်လှန်မှုကိုကြိုးစားလုပ်ဆောင်နေကြပြီး ၎င်းတို့အခက်အခဲကို ပြည်သူများနားလည်ရန်နှင့်ပတ်သပ်၍”ရှောင်ဖို့တိမ်းဖို့ အရင်ထက် ခက်ခဲလာတယ်။ ကျွန်တော်ကတော့ UG တွေ တကယ်လုပ်နေကြောင်း၊ တကယ်ခက်ခဲနေကြောင်း ပြည်သူတွေကို သိစေချင်ပါတယ်”ဟု မြို့ပြပျောက်ကျားအဖွဲ့ဝင်တစ်ဦးကလည်းပြောသည်။
စက်တင်ဘာ ၇ ရက်မှစ၍ ပြည်သူ့တပ်ဖွဲ့ဝင်များက စစ်ကောင်စီကို တိုက်ခိုက်မှုအရှိန်မြှင့်တင်ခဲ့သည်။ ရန်ကုန် ၊ပဲခူး၊ဧရာဝတီ တိုင်းသုံးခုတွင် ပြည်သူ့ကာကွယ်ရေးတပ်ဖွဲ့များက စစ်ကောင်စီပစ်မှတ်များကို အဓိကတိုက်ခိုက်သောပျံလွှာအောင်စစ်ဆင်ရေးကိုလည်း ယခုလပိုင်းအတွင်း အရှိန်မြှင့်နေသည်။
ငြိမ်းချမ်းစွာဆန္ဒထုတ်ဖော်နေသောပြည်သူများကိုရက်ရက်စက်စက်ပစ်သတ်ခဲ့ပြီးနောက် ပြည်သူများက စစ်ကောင်စီကိုဖြုတ်ချရန် လက်နက်စွဲကိုင်ခုခံတော်လှန်နေမှုအပါအဝင် ပုံစံမျိုးစုံဖြင့် စစ်အာဏာရှင်ပြုတ်ကျအောင်ကြိုးပမ်းနေမှုများအပေါ် အာဏာသိမ်းစစ်ကောင်စီက NLD ပါတီနှင့် ပါတီမှ တာဝန်ရှိသူများ၏မြှောက်ပေးမှုကြောင့် လူငယ်များက အကြမ်းဖက်နေသယောင် လူထုတော်လှန်ရေးကို ပုံဖျက်ရန်၊ဝါဒဖြန့်ရန် စစ်ကောင်စီမီဒီယာများ ၊စစ်ကောင်စီနှင့် နီးစပ်သောမီဒီယာများကဝါဒဖြန့်နေခြင်းဖြစ်သည်။
