တနင်္သာရီတိုင်း လောင်းလုံးမြို့နယ်တွင် ယနေ့ (နိုဝင် ဘာ၂၁)နံနက်ပိုင်းက အကြမ်းဖက်စစ်ကောင်စီလက်အောက်ခံရဲကားတစ်စီး မိုင်းဆွဲတိုက်ခိုက်ခံရ၍ ခြောက်ဦးသေဆုံးခဲ့ကြောင်း ဒေသခံကာကွယ်ရေးတပ်ဖွဲ့- လောင်းလုံးမြို့နယ်ပြည်သူ့ကာကွယ်ရေးအဖွဲ့ (LPDF)က ထုတ်ပြန်သည်။
လောင်းလုံးမြို့နယ်အောက်ပိုင်းကို အကြမ်းဖက်စစ်ကောင်စီလက်အောက်ခံရဲတပ်သား ၁၀ဦးခန့်ပါသည့် စစ်ကားကို LPDFနှင့် အင်းအားစုပျောက်ကျားအဖွဲ့က နံနက် ၈နာရီခွဲခန့်တွင် တိုက်ခိုက်ခဲ့ခြင်းဖြစ်သည်ဟု ထုတ်ပြန်ချက်တွင်ဖော်ပြထားသည်။
ထိုသို့ဖောက်ခွဲအပြီးတွင် အင်အား ၁၀ဦးခန့်ပါဝင်သည့် စစ်ကားတစ်စီးထပ်မံ ရောက်ရှိလာ၍ အပြန်အလှန်ပစ်ခတ်မှုဖြစ်ပွားခဲ့သည်။
ထိုဖြစ်စဉ်တွင် ရဲတပ်သား ခြောက်ဦးသေဆုံးပြီး စခန်းမှူးအပါအဝင် သုံးဦးဒဏ်ရာရရှိခဲ့သည်ဟု LPDFက ထုတ်ပြန်သည်။
Public Service Announcement
ထို့အပြင် PDFဘက်မှ ရဲဘော်တစ်ဦးကျဆုံးခဲ့သည်ဟု LPDFက ထုတ်ပြန်ထားသည်။ တိုက်ခိုက်မှုများသည် ညင်းမော်ရွာနှင့် ဂေါ့အင်းရွာအကြားတွင် ဖြစ်ပွားခဲ့ခြင်းဖြစ်သည်။
“မနက်က ရဲကားကို မိုင်းဆွဲတိုက်တာ ရဲတွေ အထိနာလို့ စစ်ကားနဲ့ လာပြီး ပစ်ခတ်သွားတာ။ ” ဟု ဒေသခံတစ်ဦးက ပြောသည်။
အဆိုပါတိုက်ခိုက်မှုကို ဒေသခံကာကွယ်ရေးတပ်ဖွဲ့များက ဆောင်ရွက်ခြင်းဖြစ်ပြီး ဒေသခံရွာသားများနှင့် သက်ဆိုင်ခြင်းမရှိကြောင်းနှင့် လက်ရှိတွင်လည်း ကာကွယ်ရေးတပ်ဖွဲ့များ ဘေးကင်းသည့်နေရာကို ရောက်ရှိနေပြီဟု ဆိုသည်။
ထိုအတူ တနင်္သာရီတိုင်း ရေဖြူမြို့နယ်တွင်လည်း နိုဝင်ဘာ ၁၈ ရက်ကလည်း စစ်ယာဥ်တန်းကို ဒေသခံကာကွယ်ရေးတပ်များက မိုင်းဆွဲတိုက်ခိုက်ခဲ့သေးသည်။
