ချင်းပြည်နယ် မင်းတပ်မြို့နယ်အတွင်း တည်ဆောက်ရေးလုပ်ငန်းများ မပြုလုပ်ရန်နှင့် ဆောင်ရွက်ဆဲလုပ်ငန်းများ ရပ်နားထားရန် သတိပေးကြောင်း မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ယနေ့(နိုဝင်ဘာ၂၅ရက်) သတင်းထုတ်ပြန် သည်။
မင်းတပ်မြို့နယ်အတွင်း အကြမ်းဖက်စစ်ကောင်စီမှ ခွင့်ပြုထားသည့် တည်ဆောက်ရေးလုပ်ငန်းများကို ကုမ္ပဏီအချို့မှ လုပ်ကိုင်ရန် စီစဉ်ထားသည်ကို သိရကြောင်းဖော်ပြထားသည်။
လက်ရှိကာလသည် ပြည်သူအားလုံးက မတရားစစ်အာဏာရှင်စနစ်ကို အမြစ်ဖြတ်ရန် ၀ိုင်းဝန်းတော်လှန်နေချိန်ဖြစ်၍ အကြမ်းဖက်စစ်ကောင်စီမှ မင်းတပ်မြို့နယ်အတွင်း ခွင့်ပြုထားသည့် တည်ဆောက်ရေးလုပ်ငန်းများကို ခွင့်ပြုလျှင် လုံခြုံရေးပြဿနာများနှင့် မလိုလားအပ်သော နောက်ဆက်တွဲ ဆိုးကျိုးပြဿနာများ ဖြစ်လာမည်ဖြစ်ကြောင်း၊ ထို့ကြောင့် တည်ဆောက်ရေးလုပ်ငန်းများအားလုံးကို လုပ်ကိုင်ဆောင်ရွက်ခြင်း မပြုရန်နှင့် ဆောင်ရွက်ဆဲ လုပ်ငန်းများ ရပ်နားပြီးဆက်လက် ဆောင်ရွက်ခြင်းမပြုရန် သတိပေးကြောင်း ထုတ်ပြန်ခဲ့သည်။