မန္တလေးမြို့တွင် အမျိုးသမီးတစ်ဦးထံမှ ပိုက်ဆံအိတ် နှင့် ဖုန်းလုယက်သူနှစ်ဦးကို လိုက်လံဖမ်းဆီးနိုင်ခဲ့ကြောင်း Ranger of Mandalay ပြည်သူ့တပ်ဖွဲ့က ယနေ့ (နိုဝင်ဘာ ၂၆ ရက်) ထုတ်ပြန်သည်။
နိုဝင်ဘာ ၂၆ ရက် နံနက် ၁၁ နာရီခန့်က (၁၁၃)လမ်းဝန်းကျင်၌ ဆိုင်ကယ်မောင်းလာသောမိန်းကလေးတစ်ဦးအား အမျိုးသားနှစ်ဦးက ဆိုင်ကယ်တွန်းကန်ပြီး လုယက်၍ မိန်းကလေးမှာ အနည်းငယ်ပွန်းပဲ့သွားခဲ့ပြီးပိုက်ဆံအိတ်နှင့် ဖုန်းပါသွားခဲ့သည်။
ထိုဖြစ်စဥ် အနီးရှိနေသောကြောင့် နောက်မှလိုက်ဖမ်းခဲ့ရာ လမ်းသွယ်တစ်ခုအတွင်း ဖမ်းမိပြီး ပိုက်ဆံအိတ်နှင့် ဖုန်းကို လုယက်ခံရသူအမျိုးသမီးထံ ပြန်ပေးနိုင်ခဲ့ကြောင်း Ranger of Mandalayက ဆိုသည်။
လုယက်သူများမှာ အသက် ၂၀ နှင့် ၂၅ ကြားရှိပြီး နယ်မှ ရွှေ့ပြောင်းလာသူများဖြစ်ကာ မြို့သစ် မင်္ဂလာကန်လမ်းနှင့် အမြန်လမ်း မြို့စွန်ရပ်ကွက်တွင် နေထိုင်သူများဖြစ်သည်ဟုလည်း ထိုအဖွဲ့က အသိပေးသည်။
ထို့အပြင် လုယက်သူနှစ်ဦး၏ ဓာတ်ပုံများကို ရိုက်ယူ ထားပြီး နောက်တစ်ကြိမ် ကျူးလွန်ပါက အသက်အာမ မခံနိုင်ဟု သတိပေးခဲ့သည်ဟုလည်း ထုတ်ပြန်ချက်၌ ဖော်ပြသည်။
မန္တလေးမြို့တွင် ဆိုင်ကယ်ဖြင့် လုယက်မှုများ ပြားနေသဖြင့် လူရှင်းသည့် လမ်းသွယ်များကို ရှောင်ကြဥ်ရန်လည်း သတိပေးထားသည်။