မန္တလေး မဟာအောင်မြေကျောက်မျက်ရောင်းဝယ်ရေးစခန်း နေရာပတ်ပတ်လည်မှာ စစ်ကောင်စီတပ်တွေ လုံခြုံရေးအပြည့်ယူထားတဲ့အတွက် ကျောက်သမားတွေအရောင်းအဝယ်မပြုလုပ်ကြဘူးလို့ သိရပါတယ်။
ဒီကနေ့ မနက်အစောပိုင်း က ကျောက်ဝိုင်းပြင်ပနေရာတွေမှာ စစ်ကောင်စီတပ်တွေရှိနေတဲ့အတွက် အရောင်းအဝယ်မပြုလုပ်ကြတာဖြစ်ပါတယ်။
“အဓိကက အပွင့်သမားတွေပေါ့ သူတို့ရှိနေလို့ပြန်လာလိုက်တာ။ ခဲ အချပ်သမားတွေကတော့ နီးစပ်ရာဆိုင်လေးတွေမှာလုပ်ကြရတယ်။ ပြောရရင် ဒီမနက်ကစပြီး အရောင်းအဝယ်မရှိတော့တဲ့သဘောပေါ့”လို့ ကျောက်အရောင်းအဝယ်ပြုလုပ်သူတစ်ဦးကပြောပါတယ်။
ကျောက်အရောင်းအဝယ်ပြုလုပ်သူတွေအနေနဲ့ ကျောက်ဝိုင်းအတွင်းမှာသာ အရောင်းအဝယ်လုပ်ကြဖို့နဲ့ မပြုလုပ်ပါက သေနတ်နဲ့ပစ်မယ်လို့စစ်ကောင်စီတပ်ဖွဲ့ဝင်တွေက ခြိမ်းခြောက်ထားတယ်လို့သိရပါတယ်။
Public Service Announcement
ကျောက်သမားတွေကတော့ ကျောက်ဝိုင်းအတွင်းဝင်ရောက် အရောင်းအဝယ် ပြုလုပ်ရင် အခွန်အခပေးရမှာဖြစ်လို့ ကျောက်ဝိုင်းပြင်ပအနီးနေရာမှာ ပြုလုပ်နေတာဖြစ်ပါတယ်။
မန္တလေးကျောက်ဝိုင်းမှာ မကြာခဏဆိုသလို ဗုံးပေါက်ကွဲတာတွေရှိသလို ပေါက်ကွဲမှုကြောင့် စစ်ကောင်စီဘက်က ဒဏ်ရာရ၊ သေဆုံးသူတွေလည်းရှိခဲ့ပါတယ်။
