'/%3E%3C/svg%3E){kind=small}
ဒေသဆိုင်ရာ ပြည်သူ့ကာကွယ်ရေးတပ်ဖွဲ့(PDF)များအား အမျိုးသားညီညွတ်ရေးအစိုးရ(NUG)က ရိက္ခာဖိုးများ စတင်ထောက်ပံ့ပေးနေပြီဖြစ်ကြောင်း ပြည်သူ့ကာ ကွယ်ရေးတပ်ဖွဲ့ဝင်များက ပြောသည်။
ထိုသို့ထောက်ပံ့ရာတွင် တပ်ရင်းတစ်ခုချင်းစီ၏ လူဦးရေအလိုက်ထောက်ပံ့ခြင်းဖြစ်ပြီး လက်ရှိတွင် ရိက္ခာဖိုးအဖြစ် တစ်ဦးလျှင်ကျပ်၂,၀၀၀ နှုန်းထောက်ပံ့ပေးနေခြင်း ဖြစ်သည်။
“ပြီးခဲ့တဲ့ရက်ကပဲ ကျနော်တို့တပ်ရင်းအတွက် ရိက္ခာဖိုးထုတ်ယူပြီးပါပြီ။ တပ်ရင်းထဲမှာရှိတဲ့လူဦးရေအလိုက် ရရှိတာဖြစ်ပါတယ်။ တစ်ယောက်ကို ၂,၀၀၀ နှုန်းနဲ့ပါ။ နောက်ပိုင်းမှာလဲ လက်နက်တပ်ဆင်ရေးအစီအစဉ် ထပ်လာမယ်လို့မျှော်လင့်ရပါတယ်”ဟု ကျောင်းသားခေါင်းဆောင်တစ်ဦးလည်းဖြစ် လက်ရှိတွင် ပြည်သူ့ကာကွယ်ရေးတပ်ဖွဲ့ဝင်တစ်ဦးလည်းဖြစ်သည့် ကိုဇေယျာလွင်က ၎င်း၏လူမှုကွန်ရက်တွင် အသိပေးရေးသားထားသည်။
အလားတူ Dawna Brothers PDF တပ်ဖွဲ့ဝင်တစ်ဦးကလည်း ၎င်းတို့တပ်ဖွဲ့ထံ NUG ၏ ထောက်ပံ့မှု ဝင်ရောက်လာပြီဖြစ်ကြောင်း အများပြုသူအား အသိပေးထားသည်။
Public Service Announcement
ပဲခူးတိုင်းပြည်သူ့ကာကွယ်ရေးတပ်ဖွဲ့မှ ဦးဆောင်သူတစ်ဦးကလည်း NUG ၏ ရိက္ခာဖိုးထောက်ပံ့ငွေများ ၎င်းတို့တပ်ဖွဲ့ထံ ရောက်ရှိလာပြီဖြစ်ကြောင်း လူထုနွေဦးသို့ အတည်ပြုသည်။
“လူဦးရေပေါ်မူတည်ပြီးခွဲတမ်းနဲ့ ထောက်ပံ့တာ”ဟု ၎င်းက ပြောသည်။
အမျိုးသားညီညွတ်ရေးအစိုး(NUG)၏ ကာကွယ် ရေးဝန်းကြီး ဦးရည်မွန်နှင့် လူထုနွေဦးသတင်းဌာနတို့ ဆက်သွယ်မေးမြန်းချက်တွင် ၎င်းတို့အနေဖြင့် ရရှိလာသည့်ဘဏ္ဍာရေးအခြေအနေပေါ်မူတည်ပြီး PDF များထံ ထောက်ပံပေးနေကြောင်း ပြောသည်။
လက်ရှိတွင် ခုခံစစ်အတွက် အရေးတကြီးလိုအပ်သော လက်နက်တပ်ဆင်ပေးရေးအပိုင်း၌ပင် PDF သင်တန်း ဆင်းအားလုံးကို လက်နက်တပ်ဆင်ပေးနိုင်ရေးမှာ ကြီးမားသညိ့စိန်ခေါ်မှုတစ်ရပ်ဖြစ်ကြောင်း ဝန်ကြီးက ပြောသည်။
“အဲဒီတော့ အခုလက်နက်တပ်ဆင်နိုင်မှုဆိုတာက ရန်ပုံငွေရရှိမှုနဲ့ပဲ တိုက်ရိုက်သက်ဆိုင်ပါတယ်။ ရန်ပုံငွေက ခွင့်ပြုသလောက်ရနိုင်သမျှ လက်နက်တွေကို ကျွန်တော်တို့ ဦးစားပေးအစီအစဥ်အတိုင်း တပ်ဆင်ပေးနေတယ်လို့ပဲ ပြောချင်ပါတယ်”ဟု ၎င်းက ဆိုသည်။
NUG မှရရှိထားသော စာရင်းများအရ လက်ရှိတွင် ပြည်သူ့ကာကွယ်ရေးတပ်ဖွဲ့ဝင်များ နိုင်ငံအနှံ့အပြား၌ တိုက်ပွဲဝင်နေပြီး ပုံစံသုံးမျိုးဖြင့် တည်ရှိနေကြောင်း သိရသည်။
၎င်းတို့တွင် တပ်မတော်တစ်ရပ်အနေဖြင့် ပြည်သူ့ကာကွယ်ရေးတပ်ဖွဲ့(PDF) ၊မြို့နယ်အလိုက်ဖွဲ့စည်းထားသည့် ပြည်သူ့ကာကွယ်ရေးတပ်(ကပဖ)နှင့် လူငယ်များအစုအဖွဲ့အလိုက်လှုပ်ရှားနေသည့် LDF စသည်တို့ဖြစ်သည်။
