မကွေးတိုင်း၊ပခုက္ကူမြို့နယ်တွင် လျှပ်စစ်မီတာနှင့် ရေမီတာခများ အတင်းအဓမ္မကောက်ခံနေ၍ မြို့နယ်လျှပ်စစ်ရုံးနှင့် စည်ပင်ရုံးအား တပြိုင်တည်းဗုံးဖောက်ခွဲသတိပေးခဲ့ကြောင်း မြို့နယ်ပြည်သူ့ကာကွယ်ရေးတပ်ဖွဲ့မှ သတင်းထုတ်ပြန်သည်။
ယမန်နေ့ ဒီဇင်ဘာလ ၅ ရက်နေ့ နေ့လယ် ၁ နာရီ ဝန်းကျင်ခန့်က ပခုက္ကူမြို့နယ်အတွင်း လျှပ်စစ်မီတာ၊ ရေမီတာ အစရှိသည့် စစ်ကောင်စီ၏ ထောက်တိုင်များဖြစ်စေမည့် အခွန်အခများ အတင်းအဓမ္မ ကောက်ခံလျက်ရှိသည်ဟု သတင်းရရှိသော မြို့နယ် လျှပ်စစ်ရုံး နှင့် စည်ပင်သာယာရေးအဖွဲ့ရုံးတို့အား ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့မှ တပြိုင်နက် ဗုံးခွဲတိုက်ခိုက်၍ သတိပေးခဲ့ကြောင်း၊ ယခုကဲ့သို့ ဗုံးခွဲတိုက်ခိုက် သတိပေးခြင်းသည် နောက်ဆုံးအကြိမ်ဖြစ်ပြီး ထပ်မံ၍ စစ်ကောင်စီ၏ ထောက်တိုင်များဖြစ်စေမည့် အခွန်အခများ အတင်းအဓမ္မကောက်ခံမည်ဆိုပါက ထိုကောက်ခံမည့် တစ်ဦးတစ်ယောက်ချင်းကိုသော်လည်းကောင်း၊ ဌာနအဖွဲ့အစည်းများ ကိုသော်လည်းကောင်း တာဝန်ယူမည်မဟုတ်ဘဲ ယခုထက် ပိုမိုထိရောက်စွာအရေးယူဆောင်ရွက်သွားမည်ဖြစ်ကြောင်း ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့ကအသိပေးထားသည်။