ရေဦး-ခင်ဦးမြို့လမ်းကြောင်းမှတစ်ဆင့် ဒီပဲယင်းမြို့နယ်အတွင်းသို့ ဝင်ရောက်နိုင်သည့် လမ်းပိုင်းများအားလုံး သွားလာခြင်း မပြုရန် ပြည်သူ့ကာကွယ်ရေးအဖွဲ့များက ယနေ့(ဒီဇင်ဘာ ၇ ရက်)တွင် အရေးပေါ် ထုတ်ပြန်သည်။
ဒီပဲယင်းမြို့နယ်အတွင်း တိုက်ပွဲ ပြင်းထန်နေခြင်းကြောင့် ရေဦး-ခင်ဦးမြို့နယ်များမှတစ်ဆင့် စစ်ကူလာနိုင်သည့် အကြမ်းဖက်စစ်ကောင်စီတပ်ကို တိုက်ခိုက်နိုင်ရန် ကြိုတင်ပြင်ဆင်ခြင်း ဖြစ်သည်။
“တန့်ဆည်မှာ အကြမ်းဖက်စစ်တပ်အထိုင် ရှိတယ်။အဲဒီကနေ ရေဦးမြို့ကနေတဆင့် ဒီပဲယင်း ကိုဝင်လာမယ်။ဒါကြောင့် ဒီလမ်းပိုင်းက အရမ်းကိုအရေးကြီးတယ်။ဒါကြောင့် ဖြစ်နိုင်ရင်ရေဦး မြို့နယ် အတွင်းက လမ်းပိုင်းများအားလုံးမှာ အသွားအလာရပ်ပေးပါ ။မမြင်ချင်ယောင်၊မကြားချင်ယောင်၊ဆောင်ပေးကြပါ ။ဒီပဲယင်း စစ်ဘေးရှောင်တွေကို တတ်နိုင်သမျှ ကူညီပေးကြပါ”ဟု ပြည်သူ့ကာကွယ် ရေးအဖွဲ့-ရေဦးမြို့နယ်တာဝန်ရှိသူတစ်ဦးက ပြောသည်။
အလားတူ “ခင်ဦး-ရေဦး- ဒီပဲယင်း လမ်းအားလုံး အရေးမကြီးလျှင် ခေတ္တရပ်ထားကြရန်၊ အကြောင်းမရှိဘဲ လမ်းပေါ် မတက်ကြပါနဲ့။တစ်စုံတစ်ခုဖြစ်လျှင် တာဝန်ယူဖြေရှင်းပေးမည်မဟုတ်ကြောင်း”ဟု ခင်ဦးဒေသပြည်သူ့တပ်ဖွဲ့ က အသိပေးသည်။
ယနေ့ နံနက်အစောပိုင်းကစ၍ ဒီပဲယင်းမြို့နယ် အနောက်ခြမ်း အောင်စည်မြေ ကျေးရွာအနီး အကြမ်းဖက်စစ်ကောင်စီနှင့် ပြည်သူ့ကာကွယ်ရေးပူးပေါင်းတပ်ဖွဲ့များ တိုက်ပွဲ ပြင်းထန်နေသည်။
အကြမ်းဖက်စစ်ကောင်စီတပ်က တိုက်ခိုက်ရေး ရဟတ်ယာဥ်များပါ အသုံးပြုပြီး လက်နက်ကြီးများဖြင့်ပါ တိုက်ခိုက်နေကြောင်း ဒီပဲယင်းမြို့နယ် ပြည်သူအုပ်ချုပ်ရေးအဖွဲ့က ဆိုသည်။
ထို့ကြောင့် ပြည်သူများဘေးအန္တရာယ်ကင်းရှင်းစေရန်နှင့် လူသားဒိုင်းအဖြစ် အသုံးပြုခံရခြင်းမှ ကာကွယ်ရန် ဒီပဲယင်း – စိုင်ပြင်လမ်းပိုင်းနှင့် အနောက်ဖက်အခြမ်းရှိ မူးဘောင်များကို လုံးဝအသုံးမပြုကြရန်လည်း အရေးပေါ်သတိပေးချက်ကို ယနေ့ ထုတ်ပြန်ထားသည်။