အင်းတော်-ကသာ၊ အင်းတော်-ထီးချိုင့်၊အင်းတော်-ဗန်းမောက်နှင့် အင်းတော်-မိုးညှင်းလမ်းပိုင်းများကို ယနေ့( ဒီဇင်ဘာ၈ရက်)က စ၍အသုံးပြုမှုအချိန်ကန့်သတ်ကြောင်း ပြည်သူ့ကာကွယ်ရေးတပ်များက သတိပေး ထုတ်ပြန်သည်။
ပြည်သူများအနေဖြင့် ကသာနှင့် အင်းတော်မြို့၏ ဆက်စပ်သည့်လမ်းပိုင်းများ၌ ည ၇နာရီမှစ၍ နံနက် ၆ နာရီအထိ လုံးဝဖြတ်သန်းသွားလာခြင်းမပြုရန် အသိပေးထားသည်။
ထို့အပြင် အသုံးပြုသွားလာနေကြသော ကုန်တင်ယာဉ်များသည် မိုးကာများအုပ်၍ သွားလာခြင်းမပြုရန် နှင့် မဖြစ်မနေ ညဖက်မောင်းနှင်သွားလာသည့် မည်သည့်မော်တော်ကားမဆို အတွင်းခန်းမီးများဖွင့်၍ မောင်းနှင် ပေးကြပါရန် ပြည်သူ့ကာကွယ်ရေးတပ်ဖွဲ့များက တောင်းဆိုထားသည်။
အလားတူ အထက်ပါလမ်းပိုင်းများကို အသုံးပြုသွားလာနေကြရသူများသည် အကြမ်းဖက်စစ်ကောင်စီ၏ ကားများနောက်မှ ကပ်မလိုက်ရန်လည်း သတိပေးသည်။
Public Service Announcement
အထူးသဖြင့် ယာဉ်မောင်းများအနေဖြင့် အကြမ်းဖက်စစ်ကောင်စီထုတ်ကုန်ပစ္စည်းများ၊ ၎င်းတို့နှင့်ဆက်စပ် ပစ္စည်းနှင့်လူများ တင်ဆောင်သယ်ယူပါက ထိရောက်စွာအရေးယူမည်ဟု ထပ်လောင်း သတိပေးသည်။
တော်လှန်ရေးအရှိန်အဟုန်သည် တစ်ရက်ထက်တစ်ရက် မြင့်တက်လာနေပြီဖြစ်သဖြင့် မိဘပြည်သူများအနေဖြင့် မလိုအပ်ဘဲ ခရီးသွားလာခြင်းမပြုကြပါရန်၊ အကယ်၍ မဖြစ်မနေသွားလာကြရလျှင်လည်း အသိပေးချက်များကို လိုက်နာ၍ သတိထားသွားလာခြင်းဖြင့် ပူးပေါင်းကူညီကြပါရန် ထုတ်ပြန်ချက်များက တိုက်တွန်းထားသည်။
ယမန်နေ့(ဒီဇင်ဘာ ၇ ရက်)ကလည်း ကသာမြို့နယ်တွင် အကြမ်းဖက်စစ် ကောင်စီတပ်နှင့် ပြည်သူ့ကာကွယ် ရေးတပ်များတိုက်ပွဲ ဖြစ်ပွားခဲ့သည်။
