မန္တလေးတွင် စာသင်ကျောင်းရှေ့တပ်စွဲထားသည့် စစ်ကောင်စီတပ် ဖောက်ခွဲတိုက်ခိုက်ခံရ၊ စစ်ကောင်စီတပ်မှ နှစ်ဦးသေ၊ နှစ်ဦးဒဏ်ရာရ

မန္တလေးမြို့ ချမ်းမြသာစည်မြို့နယ်ရှိ စာသင်ကျောင်းတစ်ကျောင်းရှေ့တွင် တပ်စွဲထားသော စစ်ကောင်စီတပ်အား ဖောက်ခွဲတိုက်ခိုက်ခဲ့ကြောင်း မန္တလေးပြည်သူ့ကာကွယ်ရေးပြောက်ကျားတပ်ဖွဲ့(GZP)က ထုတ်ပြန်သည်။

ယနေ့(ဒီဇင်ဘာ ၈)နံနက် ၈နာရီခွဲခန့်က ချမ်းမြသာစည်မြို့နယ် လက်ရွေးစင်ရပ်ကွက်ရှိ အမှတ်(၁၈) အထက်တန်းကျောင်းခွဲရှေ့ တပ်စွဲထားသော စစ်ကောင်စီတပ်များကို ဖောက်ခွဲရေးပစ္စည်းတစ်ခုအသုံးပြု၍ တိုင်ခိုက်ခဲ့သည်ဟု ထုတ်ပြန်ချက်တွင် ဖော်ပြသည်။

အဆိုပါ ဖောက်ခွဲတိုက်ခိုက်မှုကြောင့် စစ်ကောင်စီတပ်ဘက်မှ နှစ်ဦးသေဆုံးပြီး နှစ်ဦးထိခိုက်ဒဏ်ရာရရှိသည်ဟု GZP၏ ထုတ်ပြန်ချက်က ဆိုသည်။

ထို့အပြင် အပြစ်မဲ့ပြည်သူတစ်ဦးပါ ထိခိုက်ဒဏ်ရာရရှိ(မစိုးရိမ်ရ)သည်ဟု ပြန်လည်ကြားသိရ၍ များစွာစိတ်ထိ ခိုက်ရပြီး ထိခိုက်မှုရှိခဲ့သော ပြည်သူအား အနူးအညွတ်တောင်းပန်ကြောင်း အသိပေးဖော်ပြသည်။

Public Service Announcement

ဖောက်ခွဲတိုက်ခိုက်မှုအတွင်း စစ်ကောင်စီဘက်မှ ဒဏ်ရာရသူနှစ်ဦးတွင် ဗိုလ်အမှူးအဆင့်ရှိသည့် စစ်ကောင်စီ တပ်ဖွဲ့ဝင်တစ်ဦးလည်းပါဝင်ကြောင်း ဒေသခံများက ပြောသည်။

“သူတို့ဘက်က လုံခြုံရေးယူတယ် ပြောရအောင် ဘယ်သူ့လုံခြုံရေးယူတာတုန်း ကျောင်းရှေ့လာပြီး လူသားဒိုင်းအနေနဲ့ တပ်စွဲထားတာလို့ပဲ မြင်တယ်”ဟု ဒေသခံတစ်ဦးက ဖြစ်စဥ်အားအပေါ် မှတ်ချက်ပေးသည်။

အထက်ပါတိုက်ခိုက်မှုကို မန္တလေးပြည်သူ့ကာကွယ်ရေး ပြောက်ကျားတပ်ဖွဲ့(GZP)နှင့် Black Image(Mandalay) အဖွဲ့တို့ ပူးပေါင်းလုပ်ဆောင်ခဲ့ခြင်း ဖြစ်သည်။