လှိုင်သာယာမြို့နယ် အနော်ရထာဝင်းအတွင်းရှိ စစ်ကောင်စီတပ် ဗျူဟာမှူးတပ်စွဲထားသည့်နေရာကို ဗုံးပစ်လောင်ချာဖြင့် ပစ်ခတ်ခံခဲ့ရကြောင်း ဒေသခံများက ပြောသည်။
ယမန်နေ့(ဒီဇင်ဘာ ၁၁)ညပိုင်းတွင် အမည်မသိအဖွဲ့အစည်းတစ်ခုက ဗုံးပစ်လောင်ချာဖြင့် စစ်ကောင်စီတပ်မှ ဗျူဟာမှူးတပ်စွဲသည့်နေရာကို ခြောက်ကြိမ်ခန့် ပစ်ခတ်ခဲ့ခြင်းဖြစ်သည်။
“ရင်တွေ အခုထိတုန်နေတုန်း။ အကျယ်ကြီးပဲအိမ်ထဲထိတောင် ယမ်းငွေ့နံ့ကရောက်တယ်”ဟု အခင်းဖြစ်ရပ်အနီးမှ ဒေသခံတစ်ဦးကပြောသည်။
ထို့အပြင် လှိုင်သာယာအဝေးပြေးဝင်းအနီး ရန်ကုန် – ပုသိမ်လမ်းမပေါ်ရှိ ရဲတပ်ရင်း(၉)အား ဆက်လက်ပစ်ခတ်တိုက်ခိုက်ခံရပြီး တပ်ရင်းအတွင်းမှ စစ်ကောင်စီတပ်ပိုင်
ယာဥ်ငါးစီးထွက်လာချိန် ထပ်မံဗုံးခွဲတိုက်ခံခဲ့ရသည်ဟု အထက် ပါဒေသခံကဆက်ပြောသည်။
အခြားဒေသခံတစ်ဦးကလည်း “အဝေးပြေးဘက် တပ်ရင်း(၉) စခန်းကို ဗုံးပစ်တာ။ နာရီဝက်လောက်ကြာတော့ စစ်ကောင်စီယာဥ်တန်းလာချိန် သမကုန်းမှတ်တိုင်မှာ ကားကိုဗုံးထပ်ခွဲတယ်။ ရှေ့ကားကတော့ ဗုံးထိတယ်ကြားတယ်။ နောက်ကားကစစ်ခွေးတွေကရမ်းပစ်တာ ဆူညံနေတာပဲ”ဟုပြောသည်။
ပတ်ခတ်တိုက်ခိုက်မှုများအတွင်း စစ်ကောင်စီဘက်မှ ထိခိုက်ကျဆုံးရှိနိုင်သည်ဟု ဒေသခံများက ပြောဆိုကြပြီး People’s Spring အနေဖြင့် သီးခြားအတည်ပြုချက်
မရရှိသေးပေ။
“လူနာတင်ကားသံတွေတော့ကြားတယ်။ ထိသွားကြတယ်ထင်တယ်”ဟု ရဲတပ်ရင်း(၉)အနီး နေထိုင်သူတစ်ဦးက လည်းပြောသည်။
အထက်ပါ ပစ်ခတ်တိုက်ခိုက်မှုများနှင့်စပ်လျဥ်း၍ ယနေ့(ဒီဇင်ဘာ ၁၂)နံနက်ပိုင်းအထိ မည်သည့်အဖွဲ့က လုပ်ဆောင်ခဲ့သည်ဆိုခြင်းကို ထုတ်ပြန်ကြေညာသည်ကို
မတွေ့ရသေးပေ။
(လှိုင်သာယာတွင် စစ်ကောင်စီတပ်ဖွဲ့ဝင်များက ယာဥ်များကို စစ်ဆေးနေစဥ် – ဓာတ်ပုံ – CJ)