ရန်ကုန်တိုင်း မှော်ဘီမြို့နယ်ရှိ မြောင်းတကာစက်မှုဇုံသို့ လာရောက်သည့် အကြမ်းဖက်စစ်ကောင်စီလက်အောက် ခံ တိုင်းဝန်ကြီးနှစ်ဦး ယာဥ်တန်းကို မှော်ဘီ PDFဖြင့်ပူးပေါင်းကာ အဝေးထိန်းဗုံးခွဲတိုက်ခိုက်ခဲ့ကြောင်း မှော်ဘီ့ရင်သွေးတပ်မှ တာဝန်ရှိသူတစ်ဦးက လူထုနွေဦးသို့ အတည်ပြုသည်။
“ဖြစ်စဉ်ကတော့ ကျွန်တော်တို့ သူတို့အလာကို စောင့်ပြီးတိုက်ခိုက်ဖို့လုပ်ပေမဲ့အဆင်မပြေခဲ့ပါဘူး။အဲ့ဒါကြောင့် အပြန်မှ တိုက်ခိုက်ပါတယ်”ဟု အထက်ပါတာဝန်ရှိသူကပြောသည်။
ယနေ့(ဒီဇင်ဘာ ၁၄ ရက်) နေ့လည် ၁ နာရီခွဲအချိန်ခန့်တွင် မှော်ဘီမြို့ မြို့ချောင်းလမ်းဆုံ တိုးဂိတ်အနီး၌ ဖောက်ခွဲမှူပြုလုပ်ခဲ့ခြင်းဖြစ်ပြီး နိုင်ငံခြားရင်းနှီးမြှုပ်နှံမှုဝန်ကြီးနှင့် လျှပ်စစ်ဝန်ကြီးတို့လိုက်ပါလာသည်ဟု ယူဆရသည့်ကားများကို အဝေးထိန်းဗုံးခွဲတိုက်ခိုက်ခဲ့ခြင်းဖြစ်သည်ဟု ၎င်းက ဆိုသည်။
“သူတို့လာတာ ကား၇စီးပါ၊ ၃စီမြောက်ကားကို ခွဲတဲ့အချိန်မှာဘဲ နောက်က ကားကဆင့်တိုက်ပါတယ်။ဘေးက ဆောက်လက်စ တိုးဂိတ်အစောက်အဦးကိုလဲ တိုက်မိကြပါတယ်”ဟု ယင်းဖြစ်စဥ်နှင့်ပတ်သက်၍ တာဝန်ရှိသူက ပြောသည်။
Public Service Announcement
ခရီးစဥ်တွင် ရန်ကုန်တိုင်း စီးပွားရေးဝန်ကြီး ဦးအောင်သန်းဦးနှင့် သယံဇာတရေးရာဝန်ကြီးဦးဇော်ဝင်းတို့ လိုက်ပါလာခြင်းဟု ပြောဆိုနေကြသော်လည်း လူထုနွေဦးက အတည်မပြုနိုင်ပေ။
အဆိုပါ ဝန်ကြီးများသည် မြောင်းတကာစက်မှုဇုံသို့ ရင်းနှီးမြှုပ်နှံမှု ကိစ္စရပ်များဆောင်ရွက်ရန် ကွင်းဆင်းလေ့လာခြင်းဖြစ်ပြီး အကြမ်းဖက်စစ်ကောင်စီနှင့်ပူးပေါင်း၍ တိုင်းပြည်သယံဇာတများ ၊အလုပ်သမား ပြည်သူများအပေါ် ခေါင်းပုံဖြတ်မည့် မည်သည့် ရင်းနှီးမြှုပ်နှံမှုများကို အလိုမရှိကြောင်း မှော်ဘီ့ရင်သွေး တပ်ဖွဲ့က သတင်းထုတ်ပြန်ထားသည်။
