စစ်ကိုင်းတိုင်း တန့်ဆည်မြို့လယ် မြို့တော်ခန်းမအနီးတွင် ယနေ့နံနက်ပိုင်းက စျေးဝယ်ပြန်လာသည့် ရဲလေးဦး မိုင်းခွဲတိုက်ခိုက်ခံရပြီး ထိခိုက်ဒဏ်ရာများရရှိသွားကြောင်း ဒေသခံများက ပြောသည်။
ယနေ့(ဒီဇင်ဘာလ ၁၇ရက်) နံနက် ၇နာရီ၄၅မိနစ်အချိန်က ဆိုင်ကယ်နှစ်စီးဖြင့် စျေးဝယ်ပြန်လာသော စစ်ကောင်စီလက်ပါးစေ ရဲလေးဦးအား တန့်ဆည်မြို့တော်ခန်းမအနီး စာကြည့်တိုက်နားအရောက်တွင် မိုင်းခွဲတိုက်ခိုက်ခဲ့ရာ ထိခိုက်ဒဏ်ရာများရရှိသွားပြီး အသေ အပျောက်မသိရသေးကြောင်း တန့်ဆည်အခြေစိုက် Phoenix Defence Force – Taze (တန့်ဆည်ဖီးနစ်) အဖွဲ့က သတင်းထုတ်ပြန်သည်။
“တန့်ဆည်လမ်းဆုံကနေ စျေးဝယ်ပြီး စခန်းပြန်အလာမှာဖြစ်တယ်ပြောတယ်။ ပစ်ခံရပြီးတော့ ရဲစခန်းနားကနေ ထွေအုပ်ရုံးထိ မိန်းလမ်းမကြီးကို ပိတ်ထားလိုက်ပြီ”ဟု ဒေသခံတစ်ဦးက ပြောသည်။
တန့်ဆည်မြို့နယ်သည် စစ်ကိုင်းတိုင်းအတွင်း အကြမ်း ဖက်စစ်အာဏာရှင်အား ခုခံတော်လှန်မှုအားကောင်းသည့်မြို့နယ်များတွင်ပါဝင်ပြီး ပြောက်ကျားတိုက်ခိုက်မှုများ မကြာခဏ ပြုလုပ်နေသည်။
Public Service Announcement
