ဘီးလင်းမြို့နယ်တွင် အာဏာသိမ်းစစ်ကောင်စီတပ်ဖွဲ့မှ အသက် (၆၀)အရွယ် ဒေသခံအဖွားအို တစ်ဦးကို သေနတ်ဖြင့် ပစ်သတ်ခဲ့ကြောင်း KNUက ယနေ့ ထုတ်ပြန်သည်။
ဒီဇင်ဘာ ၂၁ရက် နံနက် ၁၀နာရီတွင် စစ်ကောင်စီ၏ တပ်မ (၂၂) လက်အောက်ခံ ခလရ (၁၀၁) တပ်ရင်းသည် ကေအဲန်ယူ-ဘီးလင်းမြို့နယ် နိုဘယ်ဘော ကျေးနယ်အုပ်စု လေးခေါ့ထေ ကျေးရွာနှင့်ထော်ကလော်ခီး ကျေးရွာကြားရှိ ယာခိကလိုးတွင် အသက် (၆၀)အရွယ်ရှိ ကျေးရွာသူ နော်ခီး အား ဦးခေါင်းကို သေနတ်ဖြင့် တေ့၍ ပစ်သတ်ခဲ့ခြင်းဖြစ်သည်။
ထိုအဖွဲ့သည် ဒီဇင်ဘာ ၂၀ ရက်က ကတိုင်တီ ကျေးရွာ အာဏာသိမ်းစစ်ကောင်စီလက်အောက်ခံတပ် နှင့် အာဏာသိမ်းစစ်ကောင်စီ ပူးပေါင်းစခန်းမှ အင်အား ၆၀ဖြင့် ထော်ကလော်ခီးကျေးရွာဖက်သို့ စစ်ကြောင်းထိုးခဲ့သည်ဟု KNU က ဆိုသည်။
ထိုမှတစ်ဆင့် အဆိုပါ အာဏာသိမ်းစစ်ကောင်စီတပ်ဖွဲ့သည် ဒီဇင်ဘာ ၂၁ ရက် ညနေ ၇ နာရီခွဲတွင် ကြသောင်းဆိပ် ဘုန်းတော်ကြီးကျောင်း၌ ဝင်ရောက်တပ်စွဲခဲ့ပြီး ကျေးရွာအတွင်းရှိ လမ်းဆုံနှင့်တံတားများတွင် ကင်းပုန်းများချထားကြောင်း သိရသည်။