ဘီးလင်းနယ်မှာ KNLA ပူးပေါင်းတပ် တိုက်ခိုက်လို့ စစ်တပ် ၅ ဦး သေ

ဇူလိုင်-၉၊ ၂၀၂၆။ ထားမြတ်/People’s Spring

မွန်ပြည်နယ်၊ ဘီးလင်းမြို့နယ်အတွင်း စစ်ကြောင်းထိုးလှုပ်ရှားလာတဲ့ စစ်တပ်ကို ကရင်အမျိုးသားလွတ်မြောက်ရေးတပ်မတော်(KNLA) ပူးပေါင်းတပ်က တိုက်ခိုက်ခဲ့ရာ စစ်တပ် သေဆုံးထိခိုက်ရှိခဲ့ကြောင်း ကရင်အမျိုးသားအစည်းအရုံး(KNU) သထုံခရိုင် သတင်းရင်းမြစ်က ပြောပါတယ်။

KNU သထုံခရိုင် တပ်မဟာ(၁)နယ်မြေ ဘီးလင်းမြို့နယ် တက်တူကုန်းရွာနဲ့ ကြက်ခြေခတ်ကျေးရွာ နယ်မြေ စစ်ကြောင်းထိုးလာတဲ့ စစ်တပ်ကို ဇူလိုင် ၅ရက်မနက်မှာ တိုက်ခိုက်ခဲ့ရာ တိုက်ပွဲဖြစ်ခဲ့တယ်လို့ ဆိုပါတယ်။

စစ်တပ်က အမှတ်(၄၄) ခြေမြန်တပ်မဌာနချုပ် လက်အောက် ခလရ(၈) ၊ ပျူစောထီးအဖွဲ့ နဲ့ အမှတ် (၃၁၄)အမြောက်တပ်ရင်းတို့က ပူးပေါင်းအင်အား ၁၀၀ ကျော်နဲ့ စစ်ကြောင်းထိုးလာလို့ ၂ရက်ဆက် တိုက်ပွဲရှိခဲ့တာလို့ ပြောပါတယ်။

Public Service Announcement

ဇူလိုင် ၆ရက် မွန်းလွဲပိုင်းတိုက်ပွဲမှာ စစ်တပ်က ၅ဦး သေ၊ ၉ဦး ဒဏ်ရာရခဲ့ပြီး KNLA ပူးပေါင်းတပ်က ထိခိုက်မှုမရှိဟု အသိပေးပါတယ်။

အထိနာတဲ့ စစ်တပ်ဟာ ကုန်ပစ္စည်းသယ်ဆောင်နေသော အရပ်သားပြည်သူ ကုန်ပစ္စည်းများနဲ့ ကားများအား သိမ်းယူပြီး ကုန်ပစ္စည်းအချို့နဲ့ ကား ၂ စီးမီးရှို့ဖျက်ဆီးခဲ့တယ်လို့ သတင်းရင်းမြစ်က ပြောပါတယ်။

ဒါ့အပြင် တက်တူကုန်းရွာနဲ့ ကြက်ခြေခတ်ရွာ စေတီမုခ်၀အနီးက နေအိမ် ၆လုံးကို မွှေနှောက် ပစ္စည်းတွေယူပြီး မီးရှို့ဖျက်ဆီးသွားတယ်လို့ ပြောပါတယ်။

ဒါ့အပြင် ကုန်ပစ္စည်းသယ်တဲ့ ယာဥ်မောင်း ၁ဦးနဲ့ တက်တူကုန်းရွာသား ၁ဦးကို စစ်တပ်က ဖမ်းဆီးခဲ့ပြီး ယနေ့ထိ ပြန်မလွှတ်သေးဘူးလို့လည်း သထုံခရိုင် သတင်းရင်းမြစ်က ပြောပါတယ်။

အာဏာသိမ်းစစ်တပ်ဟာ KNU တပ်မဟာ(၁)နယ်မြေအတွင်း ပြည်သူလူထု နေထိုင်ရာနေရာတွေကို လေကြောင်း၊ လက်နက်ကြီးတိုက်ခိုက်တာတွေ မကြာခဏ ပြုလုပ်ခဲ့လို့ အခုလပိုင်းအတွင်း အရပ်သား ပြည်သူသေဆုံးမှုတွေရှိခဲ့ပါတယ်။