ကချင်ပြည်နယ် ဖားကန့်မြို့နယ် ရှဒူးဇွတ်ရွာအနီးတပ်စွဲထားသည့် စစ်ကောင်စီလက်အောက်ခံ ပြည်သူ့စစ် တပ်နှင့်တိုက်ပွဲဖြစ်ပွားခဲ့၍ လက်နက်၊ စစ်အသုံးအဆောက်နှင့် စစ်ကားတစ်စီးကို ဖမ်းဆီးသိမ်းယူခဲ့သည်ဟု ကချင်လွတ်လပ်ရေးတပ်မတော်(KIA) သတင်းနှင့်ပြန်ကြားရေးဌာနက သတင်းဖော်ပြသည်။
KIA တပ်မဟာ(၂) တပ်ရင်း(၁၄)နယ်မြေ ရှဒူးဇွပ်ရွာအနီး လမ်းဆုံ၌ ဒီဇင်ဘာ ၂၇ရက် နံနက် ၁၀နာရီကျော်အချိန်၌ KIAနှင့် စစ်ကောင်စီ လက်ပါးစေပြည်သူ့စစ်များ တိုက်ပွဲဖြစ်ပွားခဲ့သည်ဟု ဖော်ပြထားသည်။
အဆိုပါ ပြည်သူ့စစ်များ KIA နယ်မြေ စခန်းသို့ တိုးချဲ့ဝင်လာ၍ တိုက်ခိုက်ချေမှုန်းခဲ့ခြင်းဖြစ်ကြောင်း၊ ပြည်သူ့စစ်များ၏ လက်နက်၊ စစ်အသုံးအဆောင် X4Wစစ်ကားတစ်စီးကိုလည်း ဖမ်းဆီးသိမ်းယူခဲ့ကြောင်း KIA သတင်းနှင့် ပြန်ကြားရေးဌာန Kachinnet Burmeseက ဖော်ပြသည်။
KIAအနေဖြင့် ပြီးခဲ့သည့် ရက်ပိုင်းကလည်း မိုးကောင်းမြို့နယ် ဆားမှော်ဒေသ ကညှင်မြိုင်ရွာ၌ တပ်စွဲထားသည့် စစ်ကောင်စီတပ်၏ ခမရ (၃၈၃) တပ်ကို တိုက်ခိုက်သိမ်းပိုက်ခဲ့ရာ စစ်ကောင်စီတပ်ဖွဲ့ဝင်များ သေဆုံးထိခိုက် မှုရှိခဲ့ပြီး စစ်လက်နက်အသုံးအဆောင်များ ရရှိခဲ့သည်။